Verkorte ESG en Volhoubaarheidsverslag

Remgro se rol is om oor die lang termyn volhoubare waarde vir belanghebbendes te skep, en sterk en volhoubare finansiële opbrengste vir belanghebbendes te behaal, insluitende omvattende voorspoed, maatskaplike vooruitgang en ʼn veerkragtigerplaneet.

Die onderliggende beleggings is gevestigde besighede met onafhanklike direksies. Die maatskappye en direksies se volwassenheidsvlak verskil met betrekking tot begrip en bestuur van omgewings-, maatskaplike en bestuurs- (ESG), asook volhoubaarheidskwessies. Remgro se benadering is een van rentmeesterskap en invloed, eerder as beheer.

Oorsig: ons ESG en volhoubaarheidsreis

As ’n waardegedrewe besigheid, erken Remgro al ‘n geruime tyd sy ESG-verantwoordelikheid en is die groep doelgerig terwyl die gepaardgaande uitdagings groter en dringender raak.

In 2021 het Remgro hom weer daartoe verbind om ESG en die oorgang na korporatiewe volhoubaarheid met die maatskappy se kernstrategie en die toekomstige sukses van die besigheid te integreer. Deur ESG en ’n volhoubaarheidstrategie deel te maak van Remgro se DNS, demonstreer ons ons toewyding aan langtermynwaardeskepping en -beskerming.

Die impak van klimaatsverandering vereis wedersydse samewerking tussen besighede, die samelewing en die omgewing. Remgro se doelwitte en aksies sluit strewe na ’n toekoms van zero koolstofvrystellings, in lyn met die doelwitte van die Parysooreenkoms in. Ons speel ook ‘n verwante rol in die ondersteuning van Suid-Afrika se pogings om die Verenigde Nasies (VN) se volhoubare ontwikkelingsdoelwitte vir 2030 te verwesentlik.

Remgro se eie ESG-doelwitte en -reis weerspieël Suid-Afrika se unieke volhoubaarheidsuitdagings; en is daarop gemik om die geleenthede en risiko’s wat daarmee gepaard gaan, aan te spreek. Ons steun vir Suid-Afrika se oorgang na volhoubaarheid hang af van ons vermoë om verbeterde maatskaplike en omgewingsimpak deur ons waardeketting en vennootskappe te bewerkstellig.

Dit sluit aan by ons doelwit om te belê in maatskappye wat die oorgang na ’n meer volhoubare toekoms sal versnel, om Suid-Afrika se voorspoed te bevorder deur langtermyn waarde te skep vir ons aandeelhouers en ander belanghebbendes.

Ons het drie prioriteite vir ons ESG-strategie geïdentifiseer wat die voortdurende volhoubaarheidsreis van Remgro ondersteun en lei: volhoubare beleggingsrentmeesterskap; ESG-aksie regdeur Remgro; en die ontsluiting van gedeelde waarde vir Suid-Afrika.

Volhoubare beleggingsrentmeesterskap

Remgro se benadering tot ESG en volhoubaarheid is geanker in ons rentmeestersrol in die bestuur van ons bates en die oorweging van nuwe beleggings – ’n rol wat ons as kritiek beskou. Ons beginsels vir verantwoordelike belegging is die hoeksteen van ons besluitneming wat ons in staat stel om trou te bly aan die robuuste kriteria vir ons beleggings, volhoubare finansiële opbrengste te lewer, en terselfdertyd ’n positiewe, meetbare ESG-impak te bevorder wat gedeelde waarde vir al ons belanghebbendes lewer.

Remgro se fokus op volhoubare beleggingsrentmeesterskap sluit aan by die groep se volhoubaarheidstrewes. ’n Integrale deel van sy verantwoordelike beleggingsbesluitneming word bepaal deur die ESG-beleggingsraamwerk wat kriteria rakende ESG-risiko, impakoorwegings, waardeskeppingsgeleenthede en volhoubaarheid van sy bestaande en potensiële beleggings insluit.

Implementering van die ESG-beleggingsraamwerk word deur die standaardbedryfsprosedure (SBO) ondersteun om die verskillende bestuurstrukture en beleggingspanne in staat te stel om die ESG-raamwerk konsekwent en doeltreffend in al die onderliggende beleggings toe te pas.

Remgro het ’n derde beoordeling uitgevoer van ’n ondergroep van onderliggende beleggings om vas te stel hoe hulle wesentlike ESG-kwessies bestuur en meet. Ons het meer onderliggende beleggings as in die vorige jaar by ons basislyn- ESG-voetspoorverslag ingesluit om aanvaarding en vordering van volhoubare praktyke in die hele groep beter te monitor. Die beoordeling het van 10 tot 11 maatskappye uitgebrei.

ESG-aksie regdeur Remgro

As ’n houermaatskappy, gebruik Remgro invloed, rentmeesterskap en kennis om verbeterde ESG-prestasie binne die groep te bevorder. Die ESG-samewerkingskonferensie wat in Oktober 2023 vir die groep se beleggingsbestuurders, die bestuur van die operasionele ESG-komitee, die voorsitter van die strategiese ESG-komitee, asook sleutel-individue van die onderliggende beleggings gehou is, was ’n belangrike platform om Remgro se ambisies en verwagtinge te bespreek. Dit het tot verbeterde uitruiling van inligting gelei wat dit moontlik gemaak het om betekenisvolle aksieplanne in werking te stel om sleutelkwessies aan te spreek.

Remgro werk regdeur die groep om volhoubare gedrag te bewerkstellig deur ESG-beginsels toe te pas en konsekwente standaarde te skep om ons gemeenskaplike volhoubaarheidsdoelwitte te bereik wat gesamentlik ’n groter en meer meetbare impak sal hê. Bestuurs- en klimaatsverwante risikoverminderingspraktyke vorm deel van Remgro se waardeketting, insluitende die ekosisteme van die onderliggende beleggings, en is belangrik om vordering ter verwesentliking van koolstofverwydering stukrag te gee.

Hoewel daar nog baie gedoen moet word, kan ons reeds die vordering ten opsigte van klimaataksie sien. Baie van die onderliggende beleggings het ESG-teikens ten opsigte van klimaatsverandering en energiebestuur gestel. Meer as die helfte van die 11 geassesseerde onderliggende beleggings het koolstofverwyderingsdoelwitte gestel, terwyl twee dit tans oorweeg om teikens te stel. Ses het teikens vir energiedoeltreffendheid, en twee is in die proses om energiedoeltreffendheidteikens te stel. Remgro beoog om met die oorblywende maatskappye saam te werk om hul volgehoue implementeringsaksies, asook die ontwikkeling van toekomstige doelwitte in hierdie verband, te ondersteun.

Ontsluiting van gedeelde waarde vir Suid-Afrika

Remgro speel ’n deurslaggewende rol om gedeelde waarde te ontsluit en ’n meer voorspoedige en gelyke toekoms vir alle Suid- Afrikaners moontlik te maak. Deur inklusiewe sosio-ekonomiese ontwikkeling en groei te skep, kan ons help om ’n beduidende impak vir al ons belanghebbendes te bewerkstellig en ’n positiewe bydrae lewer om ’n verskil te maak in die samelewing.

Remgro ondersteun gesamentlike aksie tussen besighede en die nasionale regering om kritieke kwessies waardeur Suid-Afrika in die gesig gestaar word, op te los. Deur tyd en senior uitvoerende hulpbronne aan hierdie programme toe te wy, is van openbare belang en stimuleer die ekonomie op maniere wat werkskepping, indiensneming en die welstand van ons mense ondersteun.

By Remgro erken en bevestig ons die belangrikheid van transformasie en bemagtiging om toegang tot gelyke geleenthede vir alle Suid-Afrikaners te skep. Ons streef deurgaans daarna om ons gradering vir breë-basis swart ekonomiese bemagtiging (BBSEB) te verbeter. Al ons geassesseerde onderliggende beleggings rapporteer hul BBSEB-maatstawwe. Ons bly toegewyd daaraan om ’n meer gelyke werkomgewing te skep wat op diversiteit en inklusiwiteit gegrond is en om ons werknemers deur vaardigheids- en talentontwikkeling te bemagtig.

Ons ondersteuning aan gemeenskappe is toegespits op die ontsluiting van gedeelde waarde om sosio-ekonomiese ontwikkeling te bewerkstellig op ’n wyse wat die lewens van die mense van Suid-Afrika verbeter. Dit is in ooreenstemming met die VN se volhoubare ontwikkelingsdoelwitte wat ons gebruik om impak te meet. Dit sluit werk in die gemeenskappe in waar ons met nie-regeringsorganisasies saamwerk, asook korporatiewe maatskaplike beleggings-, oftewel KMB-, projekte wat betrokke is by ondernemings- en gemeenskapsontwikkeling en die skep van geleenthede vir jongmense in onderwys en opleiding om armoede uit te wis en ’n volhoubare lewensbestaan moontlik te maak.

In 2023 het Remgro ’n werksessie aangebied sodat sy onderliggende beleggings hul maatskaplike impak-inisiatiewe en KMB-planne kon bespreek, met die doel om gedeelde geleenthede vir samewerking te ontgin. Hierdie dialoog gaan voort en Remgro beoog verdere werksessies, waar ander ESGonderwerpe gedek sal word om ervaring, kennis en beste praktyk regdeur die groep te benut.

Bestuur en oorsig

Gedurende die finansiële jaar is verbeteringe aan ons ESGbestuursraamwerk, asook spesifieke ESG-kwessies, aangebring.

Toe ons hierdie reis onderneem het, het ons erken dat ons interne definisie van ESG en volhoubaarheid uitgebrei moet word en dat dit die direksie moet ondersteun om die nodige oorsig uit te voer. Die direksie van Remgro se strategiese ESG-komitee is gestig onder voorsitterskap van mnr Murphy Morobe, ’n onafhanklike nie-uitvoerende direkteur. Die komitee vergader kwartaalliks om oorsig te verskaf rakende die opneming van ESG-strategie, -beleide en -rasionaal in beleggingsbesluite.

’n Operasionele ESG-komitee vergader maandeliks en is onder voorsitterskap van mnr Pieter Uys wat ’n lid van die uitvoerende bestuurskomitee is en ook op die strategiese ESG-komitee dien. Die komitee word ondersteun deur mev Mariza Lubbe, die uitvoerende direkteur van nakoming en KMB, en me Tanis Brown, die ESG-bestuurder.

As deel van ons geskeduleerde hersiening van ESG-bestuur, en ter erkenning van ons groeiende begrip van ESG- en volhoubaarheidskwessies, het die direksie besluit om die strategiese ESG-komitee met die maatskaplike-en-etiesekomitee te laat saamsmelt effektief vanaf 1 Julie 2024. Hierdie nuwe komitee sal oor ’n hersiene handves beskik en kwartaalliks vergader.

Beleidsveranderinge

Benewens die veranderinge aan ESG-bestuursstrukture, het ons verskeie beleide nagegaan en hersien en die beleidsraamwerk verder uitgebrei.

• Die beleid vir deursigtige belasting is hersien, goedgekeur en in April 2024 op Remgro se webwerf gepubliseer. Dit beklemtoon weereens Remgro se toewyding aan volle nakoming van die letter en gees van belastingwette binne die jurisdiksies waarin Remgro en sy filiaalmaatskappye werksaam is.
• ’n Beleid vir verantwoordelike verkryging is ontwikkel en gepubliseer in ooreenstemming met teikens wat in 2023 gestel is. Hierdie beleid is goedgekeur en in Mei 2024 op die groep se webwerf gepubliseer. Dit sit sleutelbeginsels vir verantwoordelikheid in die verskaffingsketting uiteen. Dit is aan sleutelbelanghebbendes gekommunikeer, insluitende Remgro se onderliggende beleggings wat aangemoedig is om die beginsels aan te neem en die stawende dokumentasie te gebruik. Die dokument is beskikbaar gestel aan verskaffers, professionele diensteverskaffers, subkontrakteurs en ander belanghebbendes wat van die verskaffingsketting deel vorm. Sleutelkwessies wat in die beleid gedek word, sluit in menseregte, billike arbeidspraktyke, omgewingsrentmeesterskap, bedryfsetiek en -integriteit en vertroulikheid van inligting. Die beleid vir verantwoordelike verkryging word ondersteun deur ’n diagnostiese vraelys vir verskaffers en kontrakteurs wat beskikbaar gestel is aan alle onderliggende beleggings om hulle in hul eie prosesse te ondersteun.
• ’n Verklaring oor die beginsels wat Remgro se maatskaplike beleggings lei is in Junie 2024 gepubliseer. Fokusgebiede soos sifting en keuring, voorwaardes en maatstawwe word gedek.
• Die beleide is op die maatskappy se webwerf hier beskikbaar.

ESG-risikobestuur

’n ESG-risikoregister word tans ontwikkel om te verseker dat ESGrisiko’s ten volle binne algehele risikobestuur opgeneem word. Dit sal fokus op die nege wesentlike ESG-aspekte waaraan ons sedert 2022 werk en sluit in toekoms-georiënteerde risiko’s soos water, energie en gesondheid.

Ter ondersteuning van Remgro se volhoubaarheidstrewes en as deel van sy gevestigde bestuursmeganismes, beleid en prosedures, het Remgro verskeie inisiatiewe van stapel gestuur om ESG deel te maak van die hele groep en die onderliggende beleggings. Vordering in hierdie verband oefen steeds ’n bepalende invloed uit op prestasie en langtermynaansporings vir bestuur.

Ons vordering oor die afgelope jaar

In 2021 het Remgro meer aandag op die bestuur van ESGaspekte gevestig. Sedertdien was die fokus op die bou van sy eie strategiese benaderings en kapasiteit en om ’n gedeelde begrip te ontwikkel van wat vir belanghebbendes en onderliggende beleggings wesentlik is.

Die hooffokus in die 2024-finansiële jaar was op samewerking en betrokkenheid. Deur sy beleggingsbestuurders en -inisiatiewe, wat deur die operasionele ESG-komitee gelei is, het Remgro na meeste van die onderliggende beleggings in sy portefeulje uitgereik. Twee opleidingsessies is vir die beleggingsbestuurders gehou om hul begrip van ESG uit te brei. Onderliggende beleggings is betrek deur ’n konferensie, verskeie opnames en vraelyste en opvolgvergaderings oor wesentlike ESG-kwessies.

Ná ’n omvattende maatstafbepaling is die onderstaande nege wesentlike ESG-kwessies wat in 2022 geïdentifiseer is, in 2023 verfyn:

• Klimaatsverandering en energie
• Waterbestuur
• Afvalbestuur
• Diversiteit en inklusiwiteit
• Maatskaplike impak
• Werknemerverhoudings
• Gesondheid en veiligheid
• Verskaffingsketting en verkryging
• Bestuur

By die ESG-samewerking konferensie wat in Oktober 2023 gehou is, het Remgro sy doelwitte oor die kort tot medium termyn gedeel, en deelnemers is aangemoedig om aksies binne hul eie maatskappye te loods en gereelde terugvoering oor die vordering daarvan te verskaf. Ses van die nege is geïdentifiseer as prioriteit vir kort- tot mediumtermyn aksies.

Hierdie opnames en versoeke het aan maatskappye wat nog nie die vereiste volwassenheidsvlak in hul ESG-reise bereik het nie belangrike insig verskaf oor wat sleutelbeleggers van maatskappye verwag. Vir dié wat ’n hoër volwassenheidsvlak in hul ESG-praktyke behaal het, het die verslae ’n geleentheid gebied om hul ESG-praktyk ten toon te stel en insigte te deel.

Remgro en sy onderliggende beleggings het talle ESG-prosesse in werking gestel sedert die eerste basislyn-ESG-voetspoorverslag in Junie 2022 uitgereik is. In die afgelope jaar het die aantal onderliggende beleggings wat betrokke en beoordeel is van 10 na 11 gegroei, wat meer as 70% van INBW verteenwoordig.

Vordering met ons ESG-agenda sluit in die vergroting van die omvang van maatskappye in ons koolstofvoetspoor van sewe tot nege. Al hierdie onderliggende maatskappye buiten een het reeds ’n basislyn-beoordeling van waterverbruik uitgevoer en elkeen rapporteer BBSEB-maatstawwe. Elke maatskappy spreek ESG-bestuur aan, hetsy by ’n ESG-subkomitee of hul maatskaplike-en-etiesekomitees of risikokomitees. Sommige het ook die volwassenheidsvlak van hul ESG-bestuur verhoog deur die hersiening en hernuwing van hul volhoubaarheidstrategieë, goedkeuring van ’n klimaatsveranderingstrategie en -padkaart, bekendstelling van ’n nuwe beleid vir verantwoordelike verkryging of die verspreiding van ’n klimaatverantwoordelikheidsvraelys aan verskaffers om ’n strategie te ontwikkel vir die vermindering van kweekhuisgasvrystellings regoor die verskaffingsketting.

As deel van ons rol as ’n volhoubare beleggingsrentmeester, het Remgro ook ’n konferensie gereël waar ESG kon bespreek word. ’n Sleutel-element hiervan was die bekendstelling van ’n SBO vir ons beleggingbestuurders om ESG deel te maak van hul beleggingsbesluite.

Sedert die eerste groepwye ESG-samewerkingskonferensie wat in Oktober 2023 gehou is, is verdere samewerkingswerkswinkels aangebied. Hierdie werkswinkels het menseregte-uitdagings, afvaloplossings en volhoubaarheid, ’n kragoplossingaanbieding deur ’n bedryfdeskundige, en databeskerming en kubersekuriteit gedek.

In 2023 het Remgro ook ’n toegewyde ESG en volhoubaarheidsbestuurder aangestel om die ontwikkeling en implementering van Remgro se ESG en volhoubaarheidstrategie te stuur en lei.

Remgro se ESG en volhoubaarheidsreis is deurlopend en ons is verbind tot deursigtige en akkurate openbaarmaking van ons werksaamhede en ons vordering gemeet aan beste praktykstandaarde. Ons sal ook uitlig waar ons nog werk moet doen met betrekking tot ons doelwitte en mikpunte, asook die verwesentliking van dié wat reeds gestel is.

Nasporing van vordering

Remgro streef daarna om deursigtige en akkurate openbaarmakings van die maatskappy se ESG-werksaamhede en verbeterings te verskaf, soos gemeet aan beste praktyke. In die 2022-geïntegreerde jaarverslag het ons ons verbind tot die ontwikkeling van ’n skedule om Remgro se ESG-vordering te meet deur oor gestelde doelwitte en maatstawwe verslag te doen. Om ons toewyding te bevorder, het Remgro vanjaar openbaarmakings in ooreenstemming met die aanbevelings van die Taakspan oor Klimaatsverwante Finansiële Openbaarmakings (TCFD)- raamwerk verbeter deur die verslag met ’n klimaatsverwante risiko-ontleding aan te vul.

As ’n markgedrewe inisiatief om aanbevelings vir vrywillige en konsekwente klimaatsverwante finansiële risiko-openbaarmakings te ontwikkel, help die TCFD ons om klimaatsverandering doeltreffend aan te pak regoor die Remgro-groep om beleggingsrisiko tot die minimum te beperk en geleenthede voortspruitend uit die oorgang maksimaal te benut.

As deel van sy ESG-strategie, is Remgro ook besig om prioriteite en maatstawwe vir prestasiebeoordeling op te stel – met verwysing na die Beginsels vir Verantwoordelike Investering (PRI), die Internasionale Finansieringskorporasie (IFC) se omgewingsen maatskaplike prestasiestandaarde, die opkomende Raad vir Internasionale Volhoubaarheidstandaarde (ISSB) se werk, BBSEB en ander toepaslike Suid-Afrikaanse raamwerke vir omgewings-, maatskaplike en gemeenskapsontwikkeling.

’n Bygewerkte ESG-voetspoorverslag met sleutelprestasieinisiatiewe (SPI’s) wat by Remgro se fokusgebiede aansluit, sal in die komende jaar gebruik word om verdere ESG-teikens te stel en die uitbreiding van ESG-verslagdoening regoor die groep te bevorder.

Korporatiewe maatskaplike verantwoordelikheid

Remgro is al sedert sy ontstaan ’n waardegedrewe besigheid. Hierdie waardes inspireer die wyse waarop ons as ’n goeie korporatiewe burger optree in die gemeenskappe waarin ons werksaam is. Vir ons KMB-program meet ons impak deur gebruik te maak van die Verenigde Nasies se volhoubare ontwikkelingsdoelwitte. Remgro se KMB-besteding het gedurende die jaar onder oorsig R35 miljoen (2023: R36 miljoen) bedra.

Vir meer inligting oor die maatskappy se korporatiewe maatskaplike verantwoordelikheid, besoek die volledige ESG en Volhoubaarheidsverslag.