+27 21 888 3000
Hierdie verslag gee ‘n uiteensetting van ons vergoedingsbeleid en die vergoedingsimplementeringsverslag vir uitvoerende direkteure en nie-uitvoerende direkteure se vergoeding vir die 2024-finansiële jaar en word in drie dele aangebied:
| i) | Deel 1: Die agtergrondverslag wat konteks gee oor ons vergoedingsbeleid en prestasie; |
| ii) | Deel 2: ‘n Oorsig van die vergoedingsbeleid soos wat dit van toepassing sal wees in die 2025-finansiële jaar; en |
| iii) | Deel 3: Die vergoedingsimplementeringsverslag wat in besonderhede aandui hoe die bestaande beleid in die jaar onder oorsig geïmplementeer is, insluitende die openbaarmaking van betalings aan uitvoerende direkteure en nie-uitvoerende direkteure gemaak in die jaar geëindig 30 Junie 2024. |
Remgro se vergoedingsfilosofie word gelei deur sy volhoubaarheidsgefokusde sakestrategie, met ESG as ‘n sleutelelement, en die uiteindelike doelwit om volhoubare waarde en akkumulatiewe opbrengste oor die lang termyn vir aandeelhouers te lewer en terselfdertyd ‘n positiewe ESG-impak te bewerkstellig wat gedeelde waarde vir alle belanghebbendes ontsluit.
Ons gebruik ’n eenvoudige vergoedingstruktuur met ’n duidelike langtermynfokus om werknemers in ooreenstemming met ons langtermynstrategie te bring. Die oorkoepelende beginsels van hierdie strategie is dat vergoeding billik moet wees, ’n fokus op waardeskepping moet hê en deur sterk bestuurstoesig gerugsteun moet wees. ’n Oorsig van ons vergoedingsbenadering word in die grafiek hieronder uiteengesit.
Oorsig van prestasie- en vergoedingsuitkomste vir die jaar onder oorsig
Die uitdagende omgewing waarin besighede hul sake bedryf, het in die 2023/24-finansiële jaar voortgeduur. Die Suid-Afrikaanse ekonomie het weer ’n uitdagende tydperk beleef met ’n verwagte lustelose BBP-groei van onder 1% wat beïnvloed is deur voortslepende beperkings op vrag, logistiek, bestuurstoesig en energietoevoer, hoë rentekoerse en stygende brandstof- en voedselpryse. Daarbenewens het ongunstige weersomstandighede steeds mense se lewens en lewensbestaan nadelig beïnvloed en infrastruktuur beskadig. Oorkoepelende inflasie het verder na die Reserwebank se teikenband van 3% tot 6% geneig, en inflasie sal na verwagting teen die einde van 2024 die middelpunt van sy teikenband van 4.5% bereik. Met inflasie wat stabiliseer, word verwag dat die Reserwebank rentekoerse sal verlaag wat sal help om die finansiële druk op verbruikers te verlig en besteebare inkomste te verhoog.
Die uitkoms van die langverwagte en veelbesproke nasionale verkiesing en die vorming van ’n regering van nasionale eenheid (RNE) het die algehele vertroue in Suid-Afrika as ’n beleggingsbestemming verhoog, en ekonomiese aanwysers het positief op hierdie uitkoms gereageer. Die RNE het nou ’n kritieke rol om voortaan ’n omgewing van beleidsekerheid en volhoubare werkskepping te skep en om dringend en doeltreffend sleutelinisiatiewe te loods wat volgehoue ekonomiese groei sal fasiliteer. Van Remgro en sy onderliggende beleggings, soos alle ander Suid-Afrikaanse besighede, word verwag om suksesvol en volhoubaar sake te bedryf onder moeilike en uitdagende omstandighede wat die volgende insluit: hoë rentekoerse, skerp toenames in elektrisiteitspryse, buitelandse valuta-skommelings, voortdurende geopolitieke spanning, lae sakevertroue, asook onaanvaarbare vlakke van misdaad en korrupsie. Die sameloop van al hierdie faktore is regdeur Remgro se portefeulje gevoel, en dit het ’n uiters uitdagende bedryfsomgewing geskep waardeur sy maatskappye hul baan moes weg. As ’n groep het Remgro hard gewerk om eksterne druk sover moontlik te verminder.
Vir Remgro is die jaar onder oorsig gekenmerk deur konsolidering met ’n klem daarop om die korporatiewe aktiwiteite wat onlangs voltooi is, vas te lê en binne die groep te optimaliseer. Hierdie proses het ook ’n verskerpte fokus behels op omkeerstrategieë en positiewe momentum in Remgro se kernen groeibates, insluitende Mediclinic Group Beperk (Mediclinic), Heineken Beverages Holdings Beperk (Heineken Beverages), Community Investment Ventures Holdings Eiendoms Beperk (CIVH), RCL Foods Beperk (RCL Foods) en Siqalo Foods Eiendoms Beperk (Siqalo Foods). Remgro het ’n wisselende mate van sukses in hierdie verband gesien, met inagneming van die verskillende integrasietydlyne van die onlangse transaksies en hul impakte, tesame met die genuanseerde wyses waarop makro-ekonomiese faktore sy onderliggende beleggings beïnvloed het. Tekens dui tans daarop dat die bedryfsomgewing besig is om te verlangsaam, en Remgro bly goed geplaas om voordeel te trek uit die geleenthede wat hierdie ekonomiese siklus bied. Beduidende bestuurspogings het daarop gefokus om prestasie in sy onderliggende beleggings stukrag te gee en volhoubare waarde vir aandeelhouers te ontsluit. Dit rugsteun Remgro se strategiese imperatief om ’n betroubare beleggingsmaatskappy van keuse te wees. Nog ’n strategiese mylpaal is op 1 Julie 2024 bereik met die ontbondeling en afsonderlike notering van Rainbow Chicken Beperk (Rainbow) deur sy moedermaatskappy, RCL Foods.
In die jaar onder oorsig het die maatskappy goeie vordering met die nakoming van sy strategiese prioriteite gemaak. Hierdie prioriteite is onveranderd en ons bly daartoe verbind om ons drievoudige doelwit te verwesenlik, wat die ontsluiting van waarde vir aandeelhouers, doeltreffende kapitaaltoewysing en ‘n voortgesette fokus op volhoubaarheid behels.
Bestuur bly daartoe verbind om deur ‘n verskerpte fokus op sy kern- en groeibates, die verkoop van nie-kernbates en ‘n hernieude fokus op groeigeleenthede, bykomende waarde te ontsluit. Die maatskappy gaan ook voort met sy volhoubaarheidstrewe om, deur volgehoue verbeteringe in openbaarmaking en aandeelhouersbetrokkenheid, Remgro as ‘n ESG-bedryfsleier te vestig. Ons het in hierdie verband ons eerste jaarlikse ESGkonferensie saam met ons onderliggende beleggings gehou, en net voor die begin van die jaar onder oorsig het ons ’n sleutelaanstelling gemaak, naamlik dié van ESG-hoof.
Totale gewaarborgde pakket (TGP)
In ooreenstemming met Remgro se filosofie ten opsigte van billike en verantwoordelike vergoeding, is die volgende besluit geneem met betrekking tot verhogings:
- Uitvoerende direkteure, lede van die bestuursraad en senior bestuur het verhogings in die omgewing van 6.13% vir die 2024-finansiële jaar ontvang.
- Personeel op bestuursvlakke het verhogings van gemiddeld 6.25% en nie-bestuursvlakpersoneel het salarisaanpassings van gemiddeld ongeveer 6.5% vir die 2024-finansiële jaar ontvang.
Langtermynaansporings (LTA)-planne
Die vestigingsuitkomste van die 2021-LTA-planne, waarvan die prestasietydperk op 30 Junie 2024 geëindig het, was 89%. Die beter as verwagte uitkoms moet gesien word teen die agtergrond van die volgehoue groei van die intrinsieke netto batewaarde (INBW) (hoewel vanaf ’n laer na-Covid-19-basis), die volledige vestiging van die vrye kontantvloeimaatstaf en goeie vordering met kwalitatiewe ESG-maatstawwe wat behaal is oor die driejaartydperk vanaf 1 Julie 2021 tot 30 Junie 2024, en wat gebruik word om die prestasie-uitkoms vir die 2021-LTAtoekennings te bepaal.
Besonderhede van die vestiging van hierdie toekennings word in Deel 3 van hierdie verslag uiteengesit.
Die groep sal in die toekoms daarna beweeg om 100% van jaarlikse toekennings deel te maak van CSP-toekennings eerder as ’n kombinasie van SAR- en CSP-toekennings soos in die verlede. Dit sal ’n sterker fokus op prestasie plaas deur die toepassing van meer uitstaande prestasiemaatstawwe. Die ESG-prestasiemaatstaf het in so ’n mate ontwikkel om met ’n uitkomsgedrewe beoordeling van die ESG-maatstawwe ooreen te stem.
Wysigings is voorgestel vir beide die Remgro Ekwiteitsvereffende Aandelegroeiregplan (SAR-plan) en die Remgro Ekwiteitsvereffende Voorwaardelike Aandeleplan (CSP). Hoewel uitsluitlik die CSP in die toekoms gebruik gaan word, bly die SAR-plan geldig vir uitstaande toekennings en sal dit nie gekanselleer word nie. Die vergoedings-en-nominasiekomitee (die komitee) voorsien egter nie dat verdere toekennings ná die 2023-toekennings ingevolge hierdie plan gemaak sal word nie.
Opvolgbeplanning en billike vergoeding
Opvolgbeplanning is en was nog altyd vir die komitee ’n sleutelfokusgebied, met gelyke verteenwoordiging binne ons organisasie wat van besondere belang is en voorkeur geniet wanneer die geleentheid om nuwe aanstellings te maak hom voordoen. Die komitee is tevrede dat daar binne die verskillende verantwoordelikheidsvlakke geen beduidende geslagsbetalingsgapings is nie, maar gaan voort om die geslagsbetalingsgaping en ander billike vergoedingsverhoudings te monitor. Die komitee sal vorentoe verseker dat ’n billike vergoedingsbeleid aanvaar word wat nie net billike en gelyke betaling is nie, maar ook die nuwe vereistes vir openbaarmaking aanspreek soos deur die Maatskappywysigingswet ingestel.
Vaslegging van omgewings-, maatskaplike en bestuurs (ESG)-maatstawwe in toekenning
Remgro streef daarna om die voorkeur, betroubare beleggingsmaatskappy te wees wat konsekwent volhoubare waarde skep. Behalwe finansiële opbrengste vir aandeelhouers, streef ons om ‘n positiewe ESG-impak te maak wat alle belanghebbendes sal bevoordeel. ESG-praktyke was nog altyd deel van Remgro se kernwaardes en bestuursraamwerk; nou is dit Remgro se doelwit om ’n ESG-leier binne Suid-Afrika te wees deur sy rentmeesterskapsrol.
Sedert 2021 het ons toenemende klem op ESG-praktyke geplaas en erken dat die beste manier om die volhoubaarheidsagenda te bevorder, is om in vennootskap met onderliggende beleggings en hul waardekettings ESG-beginsels te implementeer en konsekwente standaarde daar te stel wat gesamentlik ’n groter en duideliker meetbare impak kan lewer. Binne Remgro, as houermaatskappy, word dit deur ons strategiese en operasionele ESG-komitees en nuutgevestigde samewerkingsnetwerk gedryf.
Ons rentmeesterskapsrol as belegger dryf ons ESG en volhoubaarheidsbenadering. Verantwoordelike beleggingsbeginsels lê ten grondslag ons besluitneming om te verseker dat robuuste beginsels en maatstawwe nagekom word in die lewering van volhoubare finansiële opbrengste, tesame met ’n positiewe meetbare ESG-impak. Dit sluit die doelgerigte integrering van hierdie impak in die lewensiklus van beleggings in sodat volhoubare waarde oor die lang termyn geskep kan word om die ESG-prestasie te verbeter.
Remgro bly daartoe verbind om vorm te gee aan die ESG-benadering van sy onderliggende maatskappye, en daardeur te verseker dat dié beleggings sy strewe weerspieël om omgewings-, maatskaplike en ekonomiese veranderinge regdeur die ekosisteem te bewerkstellig. Versagtende praktyke ten opsigte van bestuurs- en klimaatsrisiko is vasgelê in Remgro se waardekettingbedrywighede regdeur die groep en die ekosisteme van sy onderliggende beleggings om vordering te bewerkstellig.
Reis tot dusver
Die eerste Remgro langtermynaansporing (LTA)-toekennings, met ESG-maatstawwe, is in 2020 (synde die 2019- en 2020-LTAtoekennings) toegeken. Om bestuur verder aan te spoor en te motiveer om stukrag aan hierdie reis te gee, is kwalitatiewe ESG-maatstawwe in 2021 en 2022 in Remgro LTA-toekennings opgeneem wat gedetailleerde strategiese teikens meet wat op spesifieke datums bereik moet word. Deur die opneem van spesifieke ESG-maatstawwe in die LTA demonstreer Remgro sy openbare verbintenis tot ESG. Ná die 2023-toekennings sal ESGteikens 15% van die LTA-toekennings verteenwoordig met die fokus op sleutelmaatstawwe wat deel vorm van die ESG-maatstawwe. Dit word in meer besonderhede hieronder bespreek:
Gedurende die jaar onder oorsig is verskeie inisiatiewe bekendgestel om ’n meer inklusiewe en deelnemende proses regdeur die Remgro-groep te bewerkstellig. In Oktober 2023 het ’n ESG-konferensie sleutelbelanghebbendes in die groep suksesvol betrek om gesamentlik tot sekere doelwitte, fokusgebied en aksiestappe in te stem.
Remgro se samewerkingsnetwerk is ook verder gedurende die jaar uitgebrei om onder meer netwerke vir ESG, innovering en mense in te sluit om ooreengekome projekte en inisiatiewe te loods, te lei en deur te voer.
Bestuur het ses sleutelfokusgebiede geïdentifiseer wat die klem oor die kort tot medium termyn sal verteenwoordig. Hierdie fokusgebiede en hul doelwitte is:
- Klimaatsverandering: Om scenario-ontleding van klimaatsverandering vir Remgro en geïdentifiseerde groepmaatskappye te onderneem om ’n ingeligte strewe na nul koolstofvrystellings en toewyding tot ’n aksieplan te bewerkstellig.
- Afvalvermindering by vullingsterrein: Om spesifieke projekte te verwesentlik wat deur die ESG-konferensie en samewerkingsnetwerke geïdentifiseer is. Een inisiatief wat reeds begin het, is die samewerking tussen ’n aantal groepmaatskappye om die uitdaging van post-verbruiker verpakkingsafval aan te spreek.
- Ontledings van ESG-risiko en -geleenthede: Omvattende ontledings van bo na onder en onder na bo het reeds op groepvlak en by geïdentifiseerde groepmaatskappye begin. Die uitkoms van hierdie ontledings sal ’n bepalende invloed uitoefen op ons kritiese fokusgebiede wat water, volhoubare energie en ander kan insluit.
- Diversiteit, gelykheid en inklusiwiteit: Benewens die talle programme wat reeds by verskeie groepmaatskappye geïmplementeer is, sal daar ook ’n fokus wees op ontledings vir billike vergoeding, basislyn-ontledings vir vergoedingsverskille, asook aksieplanne om enige potensiële gebiede wat kan kommer wek, aan te spreek.
- Verantwoordelike verkryging: Remgro beoog om ’n formele beleid en strategie in plek te hê en groepmaatskappye sal, waar dit nog nie in plek is nie, soortgelyke beleide en strategieë bekendstel.
- Openbaarmaking: Om Taakspan oor Klimaatverwante Finansiële Openbaarmakings (TCFD)-verslagdoening in 2024 verder te verhoog met volledige openbaarmaking teen 2025. Om ESG-verslagdoening in ooreenstemming met internasionaal erkende raamwerk en standaarde te bring.
Dit is die komitee se siening dat die spesifieke kwalitatiewe teikens uitdagend genoeg, en in ooreenstemming met die maatskappy se strategie, is, terwyl dit suksesvol ’n stewige fondament verskaf om die maatskappy se ESG-strewe te verwesentlik.
Meer besonderhede word in Deel 2 en 3 van hierdie verslag verskaf.
Stemresultate en aandeelhouersdeelname
By die algemene jaarvergadering (AJV) wat op 4 Desember 2023 gehou is, het 65.02% van Remgro se gewone aandeelhouers ten gunste van die vergoedingsbeleid gestem, terwyl 66.99% van die gewone aandeelhouers ten gunste van die vergoedingsimplementeringsverslag gestem het. Aangesien meer as 25% van die genoteerde gewone aandeelhouers teen die vergoedingsbeleid en die vergoedingsimplementeringsverslag gestem het, is teenstemmende aandeelhouers, in nakoming van King IV en die noteringsvereistes van die JSE, genooi om met die maatskappy in gesprek te tree. Aandeelhouers is verdere geleenthede tot deelname gebied by wyse van virtuele aanbiedings tydens kontakgeleenthede wat onderneem is.
Die komitee het ’n aktiewe rol ingeneem deur na aandeelhouers se bekommernisse oor die afgelope paar jaar te luister, en dit het noodsaaklike veranderinge aan sy vergoedingsfilosofie en -beleid tot gevolg gehad. Die reis na ’n robuuste en goed toegeruste vergoedingsfilosofie en -beleid was tot dusver suksesvol. Die komitee bly ontvanklik vir die aktiewe oorweging van aandeelhouers se sienings oor enige kwessie rakende vergoeding en nominasie met die doel om ’n balans te handhaaf tussen die implementering van inisiatiewe wat onmiddellike aandag vereis en dié wat oorweging en verdere verkenning voor implementering vereis. Ter opsomming, die veranderinge wat aangebring is as gevolg van aandeelhouers se terugvoering, sluit in:
- Die bekendstelling van LTA-planne wat op prestasie gegrond is;
- Voortgesette hersiening en bekendstelling van meer uitstaande teikens vir die LTAs;
- ’n Beduidende fokusverskuiwing oor hoe die groep sy ESGverpligtinge beskou met uitstaande teikens wat vir bestuur ingestel is;
- Die openbaring van nie-finansiële teikens vir bestuur;
- Die bekendstelling van ’n Malus- en Clawback-beleid
- Die implementering van ’n minimum aandeelhoudingsvereiste (MAV)-beleid wat verseker dat bestuur onbeweeglik bly en nou belyn is met aandeelhouers se belange;
- Die kontraktering van ’n onafhanklike deskundige om die onafhanklikheid van langdienende nie-uitvoerende direkteure te beoordeel; en
- Die vrywillige keuring van alle nie-uitvoerende direkteure.
Hierdie inisiatiewe beklemtoon die komitee se voorneme om aandeelhouers se belange in ooreenstemming met dié van bestuur te bring.
’n Tweede bestuurskontakgeleentheid is gereël om betrokke aandeelhouers met beduidende aandele in die maatskappy in te sluit. Na aanleiding van aandeelhouerterugvoering is hierdie kontakgeleentheid voor die finalisering van die geïntegreerde jaarverslag geskeduleer om terugvoering te verskaf en tyd toe te laat om aandeelhouerterugvoering oor die jaar onder oorsig te oorweeg. Die maatskappy het deur hierdie proses met nagenoeg 50% van Remgro se gewone aandeelhouerbasis geskakel, en die aanbieding en besprekings het hoofsaaklik oor die samestelling, dienstermyn en opvolgbeplanning van die direksie en die vergoedingsbeleid en -implementering gehandel.
Hierdie geleenthede was uiters produktief, maar dit is eers teen die einde van Augustus 2024 afgehandel wat die komitee met min tyd oorgelaat het om aandeelhouerterugvoering te oorweeg en daarop te reageer. Die direksie het egter die volgende sleutelveranderinge goedgekeur:
| 1. | Die samestelling, dienstermyn en opvolgbeplanning van die direksie
|
| 2. | Vergoedingsbeleid
Die komitee is gedurende die bestuurskontak-geleentheid goed deur me S E N de Bruyn, mnr F Roberson en mnr P J Moleketi verteenwoordig wat omvattende terugvoering aan die komitee verskaf het. Ná robuuste besprekings het die komitee op die volgende besluit:
|
Ons glo dat hierdie hersiene prestasiemaatstawwe tesame met die aandeelhouding wat bestuur reeds besit, asook dít wat deur die MAV-toewyding uitgebou sal word, ’n sterk belyning met aandeelhouers verteenwoordig wat op sy beurt bestuur motiveer om hul bekommernis oor die voortdurende verbreding van die diskonto tot INBW aan te spreek tot in die mate wat dit binne hul beheer is.
Vergoeding is ‘n sleutelfaktor in die aansporing van werknemers op alle vlakke om Remgro te help om sy strategiese doelwitte te bereik en ‘n volhoubare besigheid oor die lang termyn te bou. Die komitee bly verbind tot skakeling met aandeelhouers en verwelkom konstruktiewe terugvoering wat hulle ten opsigte van die maatskappy se benadering tot vergoeding mag gee ten einde billike en verantwoordelike vergoeding te verseker.
By die 2024-AJV sal Remgro sy vergoedingsbeleid en vergoedingsimplementeringsverslag voorlê vir twee afsonderlike nie-bindende adviserende stemmings deur aandeelhouers (verwys na gewone besluite nommer 13 en 14 in die kennisgewing aan aandeelhouers) en die komitee sien uit na ‘n positiewe uitkoms in hierdie verband.
Aktiwiteite van vergoedings-en-nominasiekomitee in 2024
Die komitee se aktiwiteite in 2024 was daarop gerig om die bereiking van Remgro se strategiese doelwitte te monitor. Buiten sy normale funksies het die komitee toesig gehou oor:
- Veranderinge aan die SAR-plan- en CSP-reëls;
- Die hersiening van verwateringsperke op ’n individuele grondslag van die 5 290 000 (nagenoeg 1%) van uitgereikte Remgro gewone aandele na 2 645 000 (nagenoeg 0.5%) van uitgereikte Remgro gewone aandele;
- Die implementering van die MAV-beleid;
- Die migrasie na volledige toekennings onder die CSP en opwaartse kalibrering van prestasieteikens om hierdie verskuiwing te weerspieël;
- Die formulering van uitkomsgedrewe teikens vir ESG en strategiese inisiatiewe vir LTA-toekennings. Prestasie teenoor teikens word beoordeel volgens ’n bewysportefeulje wat aangebied en op ’n vyfpuntskaal beoordeel sal word; en
- Bystand aan onderliggende beleggings met die ontwikkeling van MAV-beleide.
Toekomstige fokusareas
Gedurende die 2025-finansiële jaar sal die komitee oorweging aan die volgende skenk:
- Om, in ooreenstemming met ons verbintenis van deursigtigheid en ons filosofie van billike en verantwoordelike vergoeding, voort te gaan met ons ontleding van vergoedingsverskille, insluitende om enige teenstrydighede te identifiseer en aan te spreek. Ons beoog om ons ontledings van vergoedingsverskille en ons planne om enige teenstrydighede aan te spreek, indien nodig, in die geïntegreerde jaarverslag van 2025 te openbaar;
- Om enige ander veranderinge aan ons vergoedingsverslagdoening, soos vereis deur die wysigings aan die Maatskappywet, aan te bring;
- Om te verseker dat ons interne menslike hulpbronne- en vergoedingsbeleid transformasie regdeur die besigheid ondersteun;
- Die formulering van ’n billike en verantwoordelike vergoedingsbeleid; en
- Die finalisering van prestasieteikens wat vir LTA-prestasiemaatstawwe geld.
Adviseurs
Gedurende die 2024-finansiële jaar het die komitee REMchannel betrek om bestuur en die direksie, by die uitvoering van sy pligte en verantwoordelikhede by te staan.
Die komitee is tevrede en beskou die konsultante ten volle objektief en onafhanklik.
Ten slotte
Die komitee is van mening dat Remgro se vergoedingsbeleid in die 2024-finansiële jaar sy gestelde doelwitte bereik het. Remgro streef voortdurend daarna om die maatskappy se vergoedingspraktyke te verbeter en sien uit na sy skakeling met aandeelhouers om hul ondersteuning te kry vir die besluite oor die vergoedingsbeleid en die vergoedingsimplementeringsverslag (verwys na gewone besluite nommer 13 en 14 in die kennisgewing aan aandeelhouers) van die AJV op 28 November 2024.
Die vergoedingsbeleid bied ’n oorsig van Remgro se vergoedingsbeginsels vir die organisasie as ’n geheel en is van toepassing op alle permanente werknemers. Die inligting wat in hierdie beleid verskaf word, is op aanbeveling van die komitee, deur die direksie goedgekeur. Hierdie vergoedingsbeleid sal aan ’n nie-bindende adviserende stem deur aandeelhouers by die volgende AJV op 28 November 2024 voorgelê word.
Bestuur
Die komitee word deur die direksie aangestel, met gedelegeerde gesag, en die funksies van hierdie direksiekomitee is goed gevestig binne Remgro se bedryfsomgewing. In wese is dit die rol van die komitee om billike en verantwoordelike vergoeding regdeur die maatskappy te verseker, deur die daarstel en implementering van toepaslike beleide, en dat die openbaarmaking van vergoeding akkuraat, volledig en deursigtig geskied. Uiteindelike verantwoordelikheid berus by die direksie.
Die komitee word bestuur met ’n mandaat wat jaarliks deur die direksie hersien en goedgekeur word, en wat aanbevelings vir beste bestuurspraktyk insluit. Dit dien ook om lede van die komitee te help met die uitvoering van hul rol en verantwoordelikhede.
Die komitee bestaan uit vier nie-uitvoerende direkteure, waarvan drie onafhanklik is. Die lede van die komitee vir die jaar onder oorsig was:
- Mnr J P Rupert (voorsitter);
- Me S E N De Bruyn (hoof onafhanklike nie-uitvoerende direkteur);
- Mnr P J Moleketi (onafhanklike nie-uitvoerende direkteur); en
- Mnr F Robertson (onafhanklike nie-uitvoerende direkteur).
Die direksie erken die aanbevole praktyk in King IV dat die voorsitter van die direksie nie die voorsitter van hierdie komitee behoort te wees nie, maar om die volgende redes word hierdie reëling as toepaslik beskou:
- Die noodsaaklikheid om die maatskappy se vergoedingsbenadering in ooreenstemming met die korporatiewe strategie te bring;
- Die voorsitter ontvang geen vergoeding of fooie van Remgro nie en dus is daar geen belangebotsing ten opsigte van die goedkeuring van fooie vir nie-uitvoerende direkteure nie;
- Die voorsitter is ’n beduidende aandeelhouer in die besigheid en daarom word dit nie as onbillik beskou dat hy as voorsitter van hierdie komitee dien nie; en
- Volgens die samestelling van die komitee bly die meerderheid lede van die komitee onafhanklike nie-uitvoerende direkteure.
Die komitee het twee keer gedurende die jaar formeel vergader en het verskeie informele interaksies gehad ter voorbereiding van die formele vergaderings, skakelings met aandeelhouers en voorafgaande vergaderings. Besonderhede oor die bywoning van die formele vergaderings word in die korporatiewe bestuursverslag uiteengesit.
Die opdrag van die komitee, soos vervat in die mandaat, sluit die volgende in:
Ten opsigte van die nominasiefunksie:
- Help die direksie met die proses om geskikte kandidate te identifiseer om as direkteure aan te stel;
- Verseker die daarstelling van ’n formele en deursigtige proses vir die aanstel van direkteure;
- Hou toesig oor die ontwikkeling van ’n formele induksieprogram vir nuwe direkteure;
- Evalueer die prestasie van die direksie; en
- Verseker dat formele opvolgplanne vir die direksie, hoofuitvoerende beampte (HUB) en ander bestuursraadslede ontwikkel en geïmplementeer word.
Ten opsigte van die vergoedingsfunksie:
- Hou toesig oor die daarstelling van ’n organisasiewye vergoedingsbeleid wat positiewe uitkomste bevorder binne die ekonomiese, maatskaplike en omgewingsverband waarin Remgro sy sake bedryf;
- Bevorder ’n etiese kultuur en verantwoordelike korporatiewe burgerskap binne die vergoedingsverband;
- Hou toesig oor die billike, verantwoordelike en deursigtige daarstelling en administrasie van vergoeding van alle werknemers;
- Adviseer oor die vergoeding van nie-uitvoerende direkteure, vir goedkeuring deur die aandeelhouers by die AJV;
- Verseker dat vergoeding voldoen aan Remgro se behoeftes en strategiese doelwitte en in ooreenstemming met die aandeelhouers se goedgekeurde plan en reëls geadministreer word;
- Hou toesig oor die voorbereiding, en aanbeveling aan die direksie, van die vergoedingsverslag wat in die geïntegreerde jaarverslag ingesluit moet word; en
- Verseker dat die vergoedingsbeleid en vergoedingsimplementeringsverslag vir twee afsonderlike nie-bindende adviserende stemme deur aandeelhouers by die AJV voorgelê word.
Koppeling van ESG met vergoeding
Bestaande praktyke
Werkplek-, ekonomiese, maatskaplike en omgewingsvolhoubaarheidspraktyke was nog altyd deel van Remgro se kernwaardes en deur die nuwe ESG-strategie word hierdie praktyke in die algehele vergoedingsraamwerk verskans.
| Raakpunte met ESG | Raakpunte met vergoeding |
| Omgewing | Insluiting van ESG-maatstawwe in LTA-planne Individuele SPI’s sluit spesifieke ESG-maatstawwe in |
| Maatskaplik | TGP van nie-bestuurspersoneel is mededingend en is geposisioneer rondom die 75ste persentiel van die mark Alle werknemers neem deel aan die LTA-plan Werknemers op laer vlakke ontvang oor die algemeen hoër persentasie verhogings |
| Bestuur | Balanseer werknemerbelange en dié van aandeelhouers deur groei in INBW te vergoed Belyning van bestuursvergoeding en waardeskepping vir aandeelhouers deur die aanvaarding van ‘n MAV Tree op in ooreenstemming met internasionale beste praktyke deur Malus- en Clawback-beginsels in veranderlike vergoeding te inkorporeer Duidelike en deursigtige vergoedingsrapportering Ontwikkeling van ‘n ESG-bestuursraamwerk |
Remgro se ESG-reis
Remgro se fokus is daarop om as beleggingshouermaatskappy sy impak maksimaal te verhoog deur die daarstelling en implementering van ’n ESG-strategie en -bestuursraamwerk regdeur die groep van geïdentifiseerde onderliggende beleggings. Remgro het sy ESG-reis in 2020 begin en ESGmaatstawwe word sedert 2021 aan LTAs gekoppel.
Deur voort te bou op die grondslag wat reeds gevestig is, gaan Remgro voort om ESG-maatstawwe deur middel van ’n gebalanseerde maatstafbenadering te inkorporeer, met die 2024-toekennings wat ESG-maatstawwe met ’n gewig van 15% sal insluit. Die ESG-reis se fokus oor die kort tot medium termyn sal wees om:
- Die ses sleutelfokusgebiede uit te voer soos in deel 1 van die verslag beskryf is; en
- Om hierdie fokusgebiede verder te verfyn en te verbeter om spesifieke en meetbare uitkomste vir verslagdoening in toekomstige verslae in te sluit.
Billike en verantwoordelike vergoeding regdeur die maatskappy
Die bereiking van Remgro se strategie is afhanklik van die waardes, talent en vaardighede van alle werknemers van die maatskappy en daarom beskou Remgro werknemers as kritieke bates. Remgro is verbind tot die beginsel om alle werknemers van die maatskappy te vergoed op ‘n wyse wat billik, regverdig en verantwoordelik is, en streef daarna om ‘n omgewing te skep wat inklusief is. Dié onderneming word in die vergoedingsbeleid vasgelê.
Die TGP van alle werknemers word rondom die 75ste persentiel van die mark geposisioneer en neem in ag dat die maatskappy nie korttermynaansporings (KTA) het nie. Vir uitvoerende direkteure, voorgeskrewe beamptes en senior bestuurders word die mediaan van die verwysingsgroep deur die maatskappy geteiken, volgens ‘n totale vergoedings(TV)-vergelyking. Alle werknemers, en nie net bestuurspersoneel nie, kom daarby in aanmerking vir die ontvangs van LTA-toekennings. Werknemers op die laer vlakke ontvang oor die algemeen hoër persentasie verhogings as ander werknemers.
Deurlopende handelinge in dié verband sluit in:
- Beoordeling van vergoedingsvoorwaardes tussen werknemers op dieselfde vlak in ooreenstemming met die beginsel van “gelyke betaling vir werk van gelyke waarde” ten einde te verseker dat ongeregverdigde vergoedingsongelykhede, in die besonder enige verskille vir geslag en ras, geïdentifiseer en hanteer word.
- Investering in mense, wat insluit: talentbestuur, ontwikkelingsgeleenthede vir alle werknemers, verskeie opleidingskursusse, volgens behoeftes geïdentifiseer, en ‘n werknemer-waardeaanbod, wat met korporatiewe waardes en kultuur belyn is.
- Billike en verantwoordelike vergoedingspraktyke bly ‘n sleutelfokusgebied vir die komitee in die 2025-finansiële jaar en ons het ten doel om ’n billike en verantwoordelike vergoedingsbeleid in plek te stel.
Komponente van vergoeding
Remgro het twee komponente van vergoeding, naamlik vaste vergoeding (wat byvoordele insluit) en LTAs in die vorm van die SAR-plan en die CSP. Remgro betaal nie korttermynaansporings nie en glo dat bestuur se besluitneming op die lang termyn moet fokus, in ooreenstemming met die filosofie dat hulle vergoed moet word waar langtermynwaarde wat geskep word, bewese is, sonder oormatige risikoneming oor die kort termyn.
Dieselfde vergoedingsbeginsels en -komponente is van toepassing op alle werknemers van Remgro. Die vergoedingsbeleide, -beginsels en -praktyke van Remgro se onderliggende beleggings, word deur vergoedingskomiteestrukture in daardie organisasies bestuur.
