Infrastruktuur

Profiel: CIVH is aktief in die telekommunikasie- en inligtingstegnologiesektor. Die belangrikste bedryfsmaatskappye van die groep is Dark Fibre Africa Eiendoms Beperk (DFA) en Vumatel Eiendoms Beperk (Vumatel), wat optiese veselnetwerke bou en besit. Ná die implementering van ’n interne herstrukturering gedurende 2023, is DFA en Vumatel volfiliale van Maziv Eiendoms Beperk (Maziv), ’n nuutgeskepte volfiliaal van CIVH.

Korporatiewe inligting

Volhoubaarheidsmaatstawwe

DFA is die voorste verskaffer wat vrye toegang tot vesel- en verbindingsinfrastruktuur in Suid-Afrika bied. Dit bou, installeer, bestuur en onderhou ’n optieseveselnetwerk wat telekommunikasieverkeer in stedelike gebiede, asook langafstandroetes, hanteer en aan klante (telekommunikasiemaatskappye en internetdiensverskaffers (IDVs)) verhuur word deur van ’n groothandelsmodel gebruik te maak wat vrye toegang bied. DFA besit veselbates wat oor meer as 14 000 km strek en besit netwerke in Johannesburg, Kaapstad, Durban, Midrand, Centurion en Pretoria, sowel as in kleiner stedelike gebiede, soos Oos-Londen, Polokwane, Tlokwe, Emalahleni en George, om ’n paar te noem.

Vumatel is ’n vrye toegang vesel-tot-huis (FTTH)-verskaffer en verhuur infrastruktuur aan IDVs, wat op hul beurt breëbandkleinhandelsinternetdienste aan eindgebruikers verskaf.

CIVH het ’n Maart-jaareinde en gevolglik is sy resultate vir die 12 maande geëindig 31 Maart 2024 ingesluit by dié van Remgro vir die jaar onder oorsig. Die bydrae van CIVH tot Remgro se wesensverdienste vir die jaar onder oorsig het ’n verlies van R75 miljoen bedra vergeleke met ’n wins van R206 miljoen in die vorige jaar. Die afname in CIVH se verdienste is hoofsaaklik weens hoër finansieringskoste vanweë hoër rentekoerse, hoër instandhoudings- en sekuriteitskoste om hoë netwerkbedryfstyd te verseker en die voortgesette impak van die moeilike ekonomiese omgewing op verbruikers en voortdurende mededinging in die mark.

Die groep genereer kontantvloei uit sy bedrywighede en het sy kapitaaltoewysing so geposisioneer om enige surplus kontantvloei en kapitaal in die toename van nuwe intekenare te herinvesteer eerder as in die wesentlike uitbreiding van sy netwerkvoetspoor soos in vorige jare.

Vumatel is die FTTH-markleier in beide huise binne die netwerkvoetspoor en huisverbindings in Suid-Afrika, met ’n markaandeel van sowat 36% soos in beide kategorieë gemeet. Vumatel bly ’n groeibate vir die groep namate dit voortgaan om infrastruktuur na laer lewensstandaardmeting (LSM)-gebiede uit te brei en verbindings in die tradisionele kernnetwerk en LSM-gebiede met laer reikwydte te versnel.

Vumatel se omset vir die jaar onder oorsig het met 3.2% tot R3 543 miljoen toegeneem, vergeleke met R3 432 miljoen die vorige jaar, danksy uitbreidings in die veselinfrastruktuurprogram en groei in intekenare. Die Reach-netwerk het met 12% uitgebrei met huise binne die netwerkvoetspoor wat een miljoen oorskry het en Reach-intekenare wat met 39% toegeneem het op ’n jaargrondslag.

DFA se omset vir die finansiële jaar geëindig 31 Maart 2024 het met 2.3% tot R2 715 miljoen (2023: R2 653 miljoen) toegeneem danksy goeie vraag na vesel in sy besigheidsvertakking (FTTB).

Maziv ondersteun steeds verskeie KMB-inisiatiewe wat ten doel het om volhoubare ekostelsels te skep in gemeenskappe waar sake gedoen word. Die doel is om betekenisvolle en volhoubare bydraes in hierdie gemeenskappe te maak en sodoende bande te versterk wat die wese van die handelsmerk weerspieël en dit van mededingers onderskei. Fokusgebiede sluit onderwys, veiligheid, omgewing en gesondheidsorg in. Die besigheid bly verbind tot sy skoleprojek, waar 768 skole reeds verbind is met ’n internetdiensaanbod van 1 Gbps.