Gediversifiseerde beleggingsvoertuie

Korporatiewe inligting

Volhoubaarheidsmaatstawwe

KTH is ’n toonaangewende beleggingshouermaatskappy in swart besit, met ’n sterk en gediversifiseerde bateportefeulje wat bestaan uit ’n mengsel van genoteerde en private beleggings in die media-, finansiële dienste-, nywerheid-, dienste- en gesondheidsorgsektor.

KTH se bydrae tot Remgro se wesensverdienste het R241 miljoen (2023: R437 miljoen) bedra.

KTH se wesensverdienste vir die jaar het tot R553 miljoen vanaf R1 005 miljoen in die vergelykende jaar afgeneem. Hierdie afname is hoofsaaklik vanweë die afhandeling van die verkoopstransaksie van Actom Investment Holdings Eiendoms Beperk (Actom) in die vergelykende jaar, waarvolgens Nedbank Beperk afstand gedoen het van sy reg om betaling te ontvang op die oorblywende uitstaande bedrag ingevolge die leningsooreenkoms. Dit het meegebring dat KTH ’n skuldkwytskeldingswins van ongeveer R520 miljoen erken het. Met die skuldkwytskelding uitgesluit, het KTH se wesensverdienste vir die jaar van R485 miljoen tot R553 miljoen toegeneem hoofsaaklik vanweë:

• omset van Kagiso Media wat 9% hoër as die vorige jaar teen R1 467 miljoen (2023: R1 342 miljoen) was, en omset van Lupo Bakery Eiendoms Beperk (Lupo) wat 6% hoër as die vorige jaar teen R430 miljoen (2023: R406 miljoen) was;
• ’n positiewe billike waardebeweging op sy voorkeuraandelebelegging in Momentum (R127 miljoen) danksy die toename in Momentum se aandeelprys (2023: R99 miljoen). Hierdie voorkeuraandele is in Junie 2024 in gewone aandele omskep;
• ’n toename in netto finansieringsinkomste vir die jaar van R57 miljoen (2023: netto finansieringskoste van R39 miljoen). Rente verdien op kontantbalanse het positief tot beter opbrengste bygedra. Die aflossing in die vergelykende jaar van die skuld wat met die Actom-belegging verband hou, het tot ’n vermindering in finansieringskoste gelei; en
• byna onveranderde geëkwiteerde inkomste van R230 miljoen (2023: R234 miljoen) hoofsaaklik danksy geëkwiteerde inkomste op sy belegging in Momentum (R245 miljoen), Kagiso Media Radio-geassosieerdes (R35 miljoen) en Aurora Wind Power Eiendoms Beperk (R11 miljoen), deels teengewerk deur ’n geëkwiteerde verlies van R61 miljoen wat vir die jaar op Servest erken is.

KTH se toeskryfbare verdienste vir die jaar het ’n wins van R604 miljoen (2023: R949 miljoen) bedra. Benewens die bogenoemde punte, het KTH se verdienste ook die volgende ingesluit:

• die terugskrywing van ’n waardedaling van R60 miljoen wat op die belegging in Servest erken is (2023: ’n waardedaling van R58 miljoen); en
• ’n inkomstebelastinguitgawe wat hoër was weens kapitaalwinsbelasting wat op die omskepping van Momentumvoorkeuraandele na gewone aandele betaal is.

KTH het gedurende die jaar die verkoop van Imvelo Concession Company Eiendoms Beperk suksesvol afgehandel wat gelei het tot die onterkenning van die belegging verantwoord ingevolge IFRS 5 in die vergelykende jaar. KTH het ook sy Momentum-voorkeuraandele omskep en sodoende sy Momentum-belang van ongeveer 6% tot ongeveer 8% laat toeneem. As deel van die omskeppingsproses, het KTH sy interne kontanthulpbronne gebruik om alle uitstaande skuld af te los wat met die voorkeuraandeelstruktuur verband hou.

KTH het ’n dividend van R44 miljoen aan aandeelhouers in November 2023 en R70 miljoen in April 2024 betaal.