+27 21 888 3000
Hoe ons beleggings bestuur word
Remgro het ’n paar bedryfsfiliale waarvan RCL Foods Beperk (genoteer), Siqalo Foods Eiendoms Beperk (ongenoteer), Wispeco Holdings Eiendoms Beperk (ongenoteer) en Capevin Holdings Eiendoms Beperk (ongenoteer) die mees wesentlike is. Remgro se ander beleggings bestaan uit beide genoteerde en ongenoteerde maatskappye wat nie deur Remgro beheer word nie en wat meestal geassosieerdes en gesamentlike ondernemings is vanweë die beduidende invloed of gesamentlike beheer wat Remgro deur sy direksieverteenwoordiging uitoefen.
Ondanks die vlak van invloed of beheer, het Remgro tradisioneel ’n filosofie van gedesentraliseerde bestuur aanvaar, wat beteken dat sy onderliggende beleggings selfstandige direksies en bestuurstrukture het, terwyl Remgro slegs sy invloed deur nieuitvoerende verteenwoordiging in die direksies van hierdie maatskappye uitoefen. Namate Remgro se portefeulje ontwikkel het na meer ongenoteerde blootstellings, het die bestuursfilosofie meer dinamies geraak om aan te pas by die behoeftes van die onderliggende beleggings. So benodig beleggings in ‘n vroeë fase byvoorbeeld nouer betrokkenheid en net so maak onderliggende beleggings wat nadelige marktoestande of bedryfsuitdagings ervaar meer staat op Remgro se insette en vennootskap. Terwyl ons filosofie steeds een van gedesentraliseerde, bemagtigde vennootskap is, word Remgro se aanwending van bestuurshulpbronne gedefinieer deur die vereistes van die portefeulje op enige gegewe tydstip.
Die direksie van Remgro glo dat die voorgenoemde “nommerpasmodel” die mees geskik is om prestasie op onderliggende beleggingsvlak te bevorder. Die volle verwesenliking van hierdie model word bereik deur ‘n strategiese aandeelhouersvennoot te wees wat bestuur aanspreeklik hou vir ooreengekome strategieë en teikens en geduldige finansiële kapitaal, asook bestuursondersteuning deur toegang tot Remgro se breë en diverse netwerk, verskaf. Remgro glo dat hierdie komponente voordelig vir waardetoevoegende korporatiewe transaksies is en ‘n omgewing skep waarin onderliggende beleggings in staat gestel word om hul groeistrategieë en teikens te bereik.
Daarby het Remgro onlangs die Remgro-samewerkingsnetwerk gevorm, ‘n groepwye inisiatief wat daarop gemik is om geleenthede vir beter skakeling, samewerking en die deel van inligting tot voordeel van die groep, te bevorder. Die netwerk poog om inligting en ervarings byeen te bring en die onderlinge deel van kennis en samewerking te bevorder ten opsigte van verskeie funksies by al Remgro se onderliggende beleggings. Fokusgebiede sluit tans menslike hulpbronne, korporatiewe maatskaplike besteding, energie, ESG, innovasie en tegnologie in, met bykomende geleenthede vir onderlinge waardeskepping wat deurlopend ondersoek word.
Aandeelhouersooreenkomste bestaan vir Remgro se geassosieerdes en gesamentlike ondernemings waar daar ook ander groot aandeelhouers betrokke is. Hierdie ooreenkomste dien as ’n meganisme om Remgro se regte as ’n aandeelhouer te beskerm en bestuur enige geassosieerde risiko’s. Ingevolge hierdie ooreenkomste het Remgro besluitnemingsbetrokkenheid by ’n duidelik omskrewe lys kernaangeleenthede wat hierdie ondernemings raak, soos die aanstelling of verwydering van direkteure, kapitaalstruktuur, besigheidstrategie, groot kapitale uitgawes, asook samesmeltings, verkrygings en vervreemdings. Waar Remgro nie die reg tot direksieverteenwoordiging het nie, word beleggings as portefeuljebeleggings hanteer (beleggings teen billike waarde deur ander omvattende inkomste).
As ’n verantwoordelike rentmeester van sy onderliggende beleggings, gebruik Remgro sy invloed om te verseker dat die ondernemings aan hoë standaarde voldoen in gebiede soos bestuur, interne beheer, finansiële en risikobestuur, wetlike nakoming, maatskaplike verantwoordelikheid, veiligheid, gesondheids- en omgewingsbestuur, interne oudit, etiese bestuur, inligtingsbestuur, verhoudings met belanghebbendes, opvolgbeplanning en volhoubaarheid. Om sy volhoubaarheidsagenda verder te bevorder, beoog Remgro om ‘n rentmeestersrol te vervul ten opsigte van al sy onderliggende beleggings en hul waardekettings. Deur die aanvaarding van omgewings-, maatskaplike en bestuurs (ESG)-beginsels, probeer ons volhoubare gedrag aanmoedig wat daarop gemik is om gedeelde volhoubaarheidsdoelwitte te bereik.
Namate Remgro se portefeulje na meer ongenoteerde blootstellings ontwikkel het, het ons bestuursfilosofie meer dinamies geraak om aan te pas by die behoeftes van die onderliggende beleggings.
Beleggingsfilosofie
Remgro belê in besighede, met aansien, wat in ooreenstemming met sy waardes en doelwitte is en oor kundige bestuurspanne beskik wat die potensiaal het om voortreflike verdienste, volhoubare kontantvloeigenerering en dividendgroei oor die lang termyn te lewer. Remgro gaan strategiese verbintenisse op ’n vennootskapsgrondslag aan en voeg waarde toe deur sy uitgebreide netwerk van menslike kapitaal.
As ’n waardegedrewe besigheid aanvaar Remgro verantwoordelike rentmeesterskap om bates te bestuur en nuwe beleggings te identifiseer in ooreenstemming met sy ESG beleggingsbeleid en -raamwerk. Ons verantwoordelike beleggingsbeginsels dryf beleggingsbesluite ten einde volhoubare finansiële opbrengste en positiewe, meetbare ESG-impakte te lewer.
Ons integreer impak in die lewensiklus van beleggings, met volgehoue fokus op die verbetering van die ESG-vertoning om langtermyn waarde te genereer. Remgro ondersteun onderliggende beleggings om vorm aan hul benadering tot ESG te gee en dit in ooreenstemming met ons verbintenis tot omgewings-, maatskaplike en ekonomiese verandering deur die ekosisteem te bring.
Ons sal, soos ons ESG-strategie geïmplementeer word, vordering meet deur openbaarmaking van deursigtige en akkurate ESGinligting in ooreenstemming met beste praktykestandaarde om beter toekomstige doelwitte te stel.
Remgro se beleggingstrategie en beleggingsmaatstawwe
- Remgro belê in ondernemings waar Remgro volhoubare waarde oor die lang termyn kan identifiseer en wat toegangshindernisse verskaf en verwagte beleggingsopbrengste wat meer is as Remgro se interne minimum opbrengskoers.
- Remgro kies beleggings wat voortreflike finansiële opbrengste kan lewer, terwyl positiewe, meetbare maatskaplike en/of omgewingsimpak bevorder word.
- Remgro heg waarde aan entrepreneurs en ondersteun bestuurspanne wat gerig is sover dit doel, waarde en finansiële uitkoms betref om volhoubare waarde vir belanghebbendes te skep.
- Remgro oorweeg die lewensvatbaarheid van produkte en dienste, met inagneming van produk-lewensiklusse, en streef daarna om ‘n portefeulje te handhaaf wat blootstelling bied aan siklusse in verskillende stadiums van rypwording.
- Remgro fokus op Suid-Afrikaanse beleggings en ander Afrika-lande deur onderliggende beleggings en beleggings verder weg op ‘n baie geselekteerde grondslag.
- Remgro gee voorkeur vir ongenoteerde bates en soek beduidende invloed en direksieverteenwoordiging in onderliggende beleggings.
- Remgro se standaardbedryfsprosedure help beleggingsbestuurders om ESG in hul beleggingsbesluite te integreer.
- Remgro se primêre fokus is in die volgende sektore:
- Gesondheidsorg
- Verbruikersprodukte
- Finansiële dienste
- Infrastruktuur
- Nywerheid
