Begrip vir die besigheid van Remgro

Remgro Limited / Remgro / Begrip vir die besigheid van Remgro

Begrip vir Remgro se statutêre rapportering oor netto wins

Ten einde Remgro se resultate prestasie en kontantgenererende toewysing te verstaan, moet sy gerapporteerde resultate eerstens verstaan word.

Remgro se statutêre gerapporteerde netto wins bestaan hoofsaaklik uit die volgende:

Gekonsolideerde resultate van sy filiale wat apart bedryf word, waarvan die wesentlikes RCL Foods, Rainbow, Wispeco, Siqalo Foods en Capevin insluit;
Geëkwiteerde resultate van sy beleggings in geassosieerdes en gesamentlike ondernemings (geëkwiteerde beleggings), bv. Mediclinic, OUTsurance Group, CIVH, Heineken Beverages, Air Products en TotalEnergies;

Wins/verlies met die realisasie van beleggings;
Netto waardedaling van beleggings;
Dividende ontvang van onderliggende beleggings wat as portefeuljebeleggings geklassifiseer word, bv. FirstRand en Discovery;
Rente ontvang;
Rente betaal (indien toepaslik);
Netto korporatiewe koste, insluitende vergoeding en ander voordele aan werknemers betaal; en
Belasting.

Gegewe die aard as ‘n beleggingsmaatskappy en die aansienlike hoeveelheid kontant wat beskikbaar is en bestuur word, word die bestuur van tesourierisiko’s as baie belangrik beskou. Dit word in die hoof finansiële beampte se verslag behandel.

Kapitaaltoewysing – Remgro se mees kritieke funksie

By Remgro beskou ons finansiële kapitaal as ‘n duur en beperkte bron en die weldeurdagte toewysing van hierdie bron is een van ons belangrikste funksies. Ons kapitaaltoewysingsproses moet die dinamiese omgewing waarin ons sake bedryf, in ag neem en die risiko’s en onsekerhede wat ons in die mark waarneem, opweeg teen die opbrengste wat verdien kan word.

Dit is belangrik om gedissiplineerd in ons toewysing van kapitaal te wees, om veranderinge in ons siening van risiko’s en geleenthede te monitor en, waar nodig, beslissende aksie te neem om by die veranderende landskap aan te pas. Ons probeer ook om ‘n balans te handhaaf tussen beleggings in verskillende fases van ontwikkeling en ‘n merkbare deel van Remgro se waardeskeppingsrekord is toe te skryf aan sy vermoë om beleggings, met ‘n mengsel van jong groeiondernemings en meer gevestigde kontantgenererende maatskappye, te balanseer.

Besluite oor kapitaaltoewysing bestaan uit twee gedeeltes – waar die kapitaal vandaan kom en hoe dit aangewend word – en besluite oor hoe die bronne en gebruik van kapitaal gebalanseer word, word bepaal deur interne en eksterne kragte tot die maatskappy.

As ‘n houermaatskappy kry ons kapitaal van vier potensiële bronne: opbrengste uit onderliggende beleggings (dividende, fooie of rente), verkoop van beleggings, toename in lenings of die verkryging van ekwiteitskapitaal. Daarby word kapitaal op vier maniere aangewend: die aangaan van beleggings (nuut of opvolg; organies of nie-organies), terugbetaling van lenings, betaling van dividende of die terugkoop van ons eie aandele. Die volgende tabel gee ‘n uiteensetting van spesifieke oorwegings met betrekking tot ons kapitaaltoewysingsbesluite:

Bronne van kapitaal

Opbrengste uit onderliggende beleggings (hoofsaaklik dividende)

Remgro beskou kontantgenerering, en die vermoë om kontantopbrengste aan aandeelhouers te lewer, as ‘n noodsaaklike element van sy onderliggende beleggings. Terwyl in gedagte gehou word dat ‘n belegging se ontwikkeling deur die rypwordingsiklus die dividendprofiel mettertyd kan verander, kyk Remgro na onderliggende beleggings wat kontantopbrengste aan aandeelhouers kan lewer nadat voorsiening gemaak is vir waardetoevoegende groeigeleenthede, herinvestering en die handhawing van ‘n volhoubare kapitaalstruktuur. Dividende uit die onderliggende portefeulje is die primêre bron van volhoubare, langtermyn kapitaalvorming wat die kapitaaltoewysingsproses voed.

Toenames in lenings

Hoewel Remgro se onderliggende beleggings toepaslike vlakke van lenings benut om opbrengste aan aandeelhouers te optimaliseer, volg Remgro ’n versigtige benadering tot die oorlegging van verdere hefboomfinansiering op houermaatskappyvlak. Alhoewel die ongereeldheid van korporatiewe transaksies Remgro van tyd tot tyd noop om lenings te benut, word dit gedoen met inagneming van besigheid en rentekoerssiklusse. Remgro streef daarna om ‘n konserwatiewe benadering te volg sover dit lenings by die kern betref om koste te optimaliseer en potensiële strukturele ondoeltreffendhede te vermy.

Disinvesterings

Terwyl baie van Remgro se beleggings langtermyn kernbeleggings is, is ‘n sekere mate van omloopsnelheid van bates in die portefeulje gesond en beoordeel Remgro deurlopend waar disinvesterings sy langtermyn-beleggingsbenadering ondersteun. Remgro se portefeulje verteenwoordig bronne van korttermyn-likiditeit en in hierdie verband word besluite oor disinvestering beïnvloed deur marktoestande, batepryse en geleenthede vir die heraanwending van kapitaal.

Ekwiteitsuitgifte

In gevalle waar Remgro meer kapitaal benodig om groeigeleenthede te benut as wat beskikbaar is uit interngegenereerde fondse, sy likiede kapitaalbronne of omsigtige leningsaptyt, sal daar gekyk word na die verkryging van ekwiteitskapitaal vanaf aandeelhouers.

Gebruike van kapitaal

Beleggings

As ‘n beleggingsmaatskappy is Remgro se primêre doelwit om met verloop van tyd aandeelhouerskapitaal vir waardetoevoegende beleggingsgeleenthede aan te wend en sodanige beleggings op ‘n wyse te bestuur wat waarde vir belanghebbendes sal optimaliseer. In hierdie verband het Remgro ‘n voorkeur vir organiese of ”brownfields“ geleenthede, saam met vennote of binne onderliggende beleggings, waar ‘n geleentheid bestaan om interne welwillendheid te genereer. Remgro bly ook bewus van nie-organiese groeigeleenthede deur verkrygings, op onderliggende beleggings- of Remgro-vlak, en in hierdie verband word Remgro se aptyt nie alleen beïnvloed deur die geleenthede wat beskikbaar is nie, maar ook deur die eksterne omgewing, insluitende die streeksekonomie, globale makro-ekonomiese en geopolitieke faktore, asook batepryse.

Lenings

Soos voorheen genoem, volg Remgro ‘n versigtige benadering ten opsigte van lenings by die kern en waar groeigeleenthede, of korporatiewe transaksies, die gebruik van lenings regverdig, sal Remgro daarna kyk om sodanige blootstelling met verloop van tyd verantwoordelik te verminder.

Dividende

‘n Volhoubare kontantdividend was nog altyd ‘n belangrike kenmerk van Remgro se beleggingsbenadering en daarom bly dit die voorkeurmeganisme om kontant aan aandeelhouers terug te gee.

Aandeelterugkope

Remgro sal aandeelterugkope dinamies gebruik in gevalle waar die geleentheid bestaan om aandele te koop teen ‘n marge wat wesentlik laer is as Remgro se interne beoordeling van die waarde van die portefeulje, en wanneer Remgro meer kapitaal beskikbaar het as wat nodig is vir ander prioriteite, waaronder waardetoevoegende groeiinisiatiewe in die portefeulje, die vermindering van lenings en die betaling van dividende.

In opvolging van sy verbintenis om omgewings-, maatskaplike en bestuurs (ESG)-beginsels en korporatiewe volhoubaarheid deel van sy kernstrategie te maak, bly Remgro verbind tot verantwoordelike rentmeesterskap in batebestuur en nuwe beleggings. Die doel is om volhoubare finansiële opbrengste te lewer, terwyl gepoog word om positiewe maatskaplike en omgewingsimpakte te bewerkstellig. Remgro se ESG-beleggingsraamwerk verskaf riglyne vir kapitaaltoewysing in ‘n poging om omgewings-, maatskaplike en ekonomiese verandering regdeur sy ekosisteem te bevorder.

Beleggingsmaatskappy

Remgro streef daarna om onderliggende beleggings in staat te stel om hul groeistrategieë en teikens te bereik wat waarde vir alle belanghebbendes oor die lang termyn skep. Die ondersteuning wat ons bied, ongeag die vlak van beïnvloeding, sluit in:

Strategiese insette en “denkende vennote”
Kapitaaltoewysing
- Finansiële kapitaal om groeistrategieë te ondersteun
- Menslike kapitaal by wyse van bestuursondersteuning
- ESG-doelwitte, beginsels en openbaarmakingsriglyne
Transaksievermoë

Tesouriedienste (soos benodig)
Interne oudit
Risikobestuursdienste (soos benodig)
Formele en informele netwerke vir wyer geleenthede en voordeel

Ondersteuning aan ons onderliggende beleggings

Terwyl die aangaan van transaksies op houermaatskappyvlak waarde vir aandeelhouers kan toevoeg, is die prestasie van die onderliggende beleggings die belangrikste waarde-dryfveer. Dit is waarom Remgro groot klem daarop plaas om markleiers in sy portefeulje te behou en in vennootskap met daardie spanne en individue opbrengste vir aandeelhouers te lewer.

Beoordeling van sukses

Remgro beoordeel sy vertoning verder aan die hand van die toename in sy intrinsieke netto batewaarde oor tyd. Dit meet die groei in die waarde van die onderskeie onderliggende beleggings, gemeet aan die genoteerde markwaarde of, in die geval van ongenoteerde beleggings, deur die beginsels van IFRS 13: Billike Waarde Meting toe te pas. Verwys na die hoofuitvoerende beampte se verslag hier vir ’n meer gedetailleerde ontleding van Remgro se intrinsieke netto batewaarde, waar kortliks verwys word na die verskille tussen ‘n IFRS 13-waardasie en ‘n transaksie-waardasie.

Ons glo ook dat daar oor die lang termyn ‘n duidelike verband bestaan tussen intrinsieke waarde en kontantvloei, asook opbrengsverdienste, en ons vul ons meting van intrinsieke waarde aan met ‘n bykomende fokus op kontant- en verdienstegenerering as maatstawwe wat objektief gemeet en deursigtig gerapporteer kan word.