Finansiële dienste

Profiel: OUTsurance Group is ’n groep vooraanstaande versekerings- en finansiële diensverskaffers wat in twee sleutelmarkte sake dryf. In Suid-Afrika bied OUTsurance motor-, huis-, besigheids-, lewens-, begrafnis- en troeteldierversekering. In Australië verskaf Youi motor-, huis-, besigheids- en verpligte derdepartyversekering (CTP). Die OUTsurance Group het in 2024 ’n derde mark in Ierland betree.

Korporatiewe inligting

Volhoubaarheidsmaatstawwe

OUTsurance Group se bydrae tot Remgro se wesensverdienste het met 29.4% tot R1 398 miljoen (2024: R1 080 miljoen) toegeneem. Op ’n genormaliseerde verdienstegrondslag, wat sekere afwykings uitsluit, het OUTsurance Group ’n toename van 33.7% tot R4 728 miljoen (2024: R3 536 miljoen) gerapporteer. Dit is hoofsaaklik te danke aan ’n groter bydrae deur OUTsurance Holdings Beperk (OUTsurance), die belangrikste bate in OUTsurance Group. OUTsurance se genormaliseerde verdienste het met 29.6% tot R4 962 miljoen (2024: R3 830 miljoen) toegeneem. Hierdie bevredigende resultate is ondersteun deur sterk organiese groei, gunstige natuurrampverliese, laer herversekeringskoste en hoër beleggingsinkomste. Die verbeterde verdienste-uitkoms vir die jaar is behaal ondanks die wesentlike toename in die aandeelgebaseerde betalingsuitgawe en die hoër aanvangsverlies wat vir OUTsurance Ierland gerapporteer is.

Die hoër aandeelgebaseerde betalingsuitgawe vir werknemers is gekoppel aan OUTsurance se aandeelprys wat vir die finansiële jaar met 68.7% toegeneem het. Die laaste gedeelte vestig in September 2025 waarna die leeftyd van langtermyn-aansporings na die nuwe voorwaardelike aandeleplan sal skuif. Hierdie plan het ’n laer hefboomfinansieringsverhouding wat ’n bestendiger betalingsuitgawe sal verseker. Die aandeelgebaseerde betalings-uitgawe wat aan die uitgaande skema gekoppel is, was R1 300 miljoen vir die finansiële jaar onder oorsig. Dit is R656 miljoen hoër as die vorige finansiële jaar.

OUTsurance Group is die genoteerde entiteit waarin Remgro ’n belang van 30.5% het.

Die hoofbesigheid van OUTsurance Group is:

OUTsurance SA bestaan uit twee hoofbedryfsafdelings: OUTsurance Personal en OUTsurance Business. Die genormaliseerde verdienste het met 32.4% tot R2 928 miljoen (2024: R2 212 miljoen) toegeneem. Dit is vanweë ’n sterk bedryfsvertoning danksy premie-inflasie, bevredigende organiese groei, gunstige weerstoestande en ’n laer waargenome frekwensie van eise, ondanks ’n uitgawe van R1 105 miljoen wat aan die uitgaande werknemeraandeleskema gekoppel is. OUTsurance SA het ’n algehele groei van onderskeidelik 9.7% en 9.9% in bruto geskrewe en netto verdiende premies gelewer. Die hoër groei in netto verdiende premies is vanweë gunstige herversekeringprysbepaling. Die eiseverhouding het van 49.8% tot 44.6% verbeter, en beide die Personal- en Business-afdelings het beter uitkomste gelewer. Natuurrampeise, gemeet as ’n persentasie van netto verdiende premies, het van 5.9% tot 4.0% afgeneem danksy ’n merkbare afwesigheid van groot katastrofiese gebeurtenisse.

OUTsurance Life se genormaliseerde verdienste het met 66.2% tot R349 miljoen (2024: R210 miljoen) toegeneem danksy goeie momentum in beide die Direct- en Funeral-afdelings. Ná ’n tydperk van strategiese vereenvoudiging het die besigheid se verbeterde kostedoeltreffendheid groei in bedryfswins bevorder. OUTsurance Life het ’n beduidende bykomende koste aangegaan wat aan die uitgaande werknemer-aandeleskema se betalingsuitgawe van R132 miljoen (2024: R64 miljoen) gekoppel word. Indien die hoër betalingsuitgawe geïgnoreer word, het OUTsurance Life ’n marge van 19.8% vergeleke met 12.5% in die vorige jaar behaal wat waarde van nuwe besigheid (VNB) betref. Met die hoër betalingsuitgawe ingesluit, is ’n VNB-marge van 14.7% vergeleke met 9.0% in die vorige jaar behaal. Die laer bedryfsuitgawe-profiel het tot verbeterde marges gelei.

Die Youi group (Youi) se genormaliseerde verdienste het met 45.5% tot R2 290 miljoen (2024: R1 574 miljoen) toegeneem danksy indrukwekkende omsetgroei en bedryfsprestasie vir die jaar onder oorsig. Die sterk premiegroei word toegeskryf aan die Direct-boek waar Youi, bykomend tot die impak van voortgesette premie-inflasie, goeie organiese groei gelewer het. Premie-inflasie het in die tweede helfte van die jaar omgekeer en neem tans af in ooreenstemming met huidige inflasietendense. Youi het gedurende die huidige jaar sy deelname aan die makelaarsverspreidingskanaal BZI beëindig. Benewens premie-inflasie is die gesonde bedryfswinsgroei deur sterk organiese groei en laer eise-ervaring behaal. Ondanks sikloon Alfred, ’n hewige tropiese sikloon wat die suidooste van Queensland en Nieu-Suid-Wallis se noordkus in Australië getref het, was Youi se natuurrampeise as ’n persentasie van netto verdiende premies 1.4% laer as in die vorige finansiële jaar. Bruto geskrewe premie het met 19.7% verhoog in randwaarde ten spyte van die versterking van die rand met 4.2% teen die Australiese dollar. In Australiese dollarterme was die groei 25.1%. Die eiseverhouding het van 61.1% tot 58.5% afgeneem vanweë gunstige weerstoestande en ontwikkeling van aanspreeklikheidseise in die vorige jaar.

OUTsurance Ierland, wat amptelik in Mei 2024 geloods is, het goeie momentum in die Ierse mark behaal en R269 miljoen bruto geskrewe premie in sy eerste volledige bedryfsjaar gegenereer. Genormaliseerde verliese het tot R402 miljoen (2024: genormaliseerde verlies van R180 miljoen) toegeneem. Die bedryfsverlies en netto eisuitgawe word verwring deur die vereiste om aan ’n beswaarde verlies rekenskap te gee. Die beswaarde verliesvoorsiening word deur IFRS 17 vereis vanweë die besigheid se kleiner skaal. Namate die besigheid uitbrei, sal die beswaarde verliesverhouding verklein. Die bedryfsverlies, wat beswaarde verliese uitsluit, het toegeneem vanweë ’n toename in bedryfskoste wat met bemarking en bedryfsinfrastruktuur verband hou.