Finansiële dienste

Profiel: OUTsurance Group is ’n groep vooraanstaande versekerings- en finansiële diensverskaffers wat in twee sleutelmarkte sake bedryf. Die OUTsurance Group het in 2024 ’n derde mark in Ierland betree. In Suid-Afrika bied OUTsurance motor-, huis-, besigheids-, lewens-, begrafnis- en troeteldierversekering. In Australië verskaf Youi motor-, huis-, besigheids- en verpligte derdepartyversekering (CTP).

Korporatiewe inligting

Volhoubaarheidsmaatstawwe

OUTsurance Group se bydrae tot Remgro se wesensverdienste het met 21.6% tot R1 080 miljoen (2023: R888 miljoen) toegeneem. Op ’n genormaliseerde grondslag, wat sekere afwykings uitsluit, het OUTsurance Group ’n toename van 20.3% in verdienste gerapporteer. Dit is hoofsaaklik te danke aan ’n hoër bydrae deur OUTsurance Holdings Beperk, die belangrikste bate in OUTsurance Group, asook ’n vermindering in hoofkantoorkoste ná die noteringsoorgang. OUTsurance Holdings se genormaliseerde verdienste het met 15.7% toegeneem hoofsaaklik vanweë goeie bedryfsprestasie en beleggingsinkomste en ondanks hoër natuurrampeise by Youi, die wesentlike toename in die aandeelgebaseerde betalingsuitgawe en aanvangsverlies wat deur OUTsurance Ireland aangegaan is. Die aandeelgebaseerde betalingsuitgawe is aan die geïndekseerde vertoning van die OUTsurance Group se aandeelprys gekoppel wat onbestendigheid in die uitgawe en gevolglik in die verhouding van koste-tot-inkomste skep.

OUTsurance Group is die genoteerde entiteit waarin Remgro ’n belang van 30.6% het.

Die hoofbesigheid van OUTsurance Group is:

OUTsurance SA bestaan uit twee hoofbedryfsafdelings, OUTsurance Personal en OUTsurance Business. OUTsurance SA het binne die konteks van ’n moeilike ekonomiese klimaat en hoë inflasie ’n sterk bedryfsvertoning gelewer. OUTsurance SA het ’n algehele groei van onderskeidelik 9.1% en 9.4% in bruto geskrewe en netto verdiende premies gelewer. Premie-inflasie was ’n groot bydraer in premiegroei. Die eiseverhouding het van 52.5% tot 49.8% verbeter met verbetering in beide die Personalen Business-afdelings. Behoue natuurrampeise was in lyn met verwagtinge gegrond op historiese ervaring. OUTsurance SA se algehele verhouding van koste-tot-inkomste is beïnvloed deur ’n aandeelgebaseerde betalingsuitgawe wat R256 miljoen hoër was. Dit het 2.1% persentasiepunte bygedra tot die verhouding van koste-tot-inkomste wat van 26.2% tot 27.9% toegeneem het. OUTsurance SA het ’n bedryfswins van R2 678 miljoen behaal wat ’n 17.2%-verbetering op die vorige tydperk is ten spyte van die hoër aandeelgebaseerde betalingsuitgawe.

OUTsurance Life het ’n bevredigende finansiële vertoning gelewer met winsgewendheid wat baat gevind het by sterk groei in die begrafnisafdeling en die beëindiging van die in-persoon kanaal wat prestasie in die vorige jaar belemmer het. Bedryfswins het met 82% tot R264 miljoen gegroei. OUTsurance Life het, soortgelyk aan OUTsurance, ook aansienlike bykomende koste aangegaan wat aan die hoër aandeelgebaseerde betalingsuitgawe gekoppel is. Indien die hoër aandeelgebaseerde betalingsuitgawe en die beëindigende in-persoon kanaal geïgnoreer word, het OUTsurance Life ’n marge van 10.3% vergeleke met 9.3% in die vorige jaar behaal wat waarde van nuwe besigheid (VNB) betref. Met hierdie komponente ingesluit, het OUTsurance Life ’n VNB-marge van 5.8% vergeleke met 1.9% in die vorige jaar behaal. Hierdie verbetering kan toegeskryf word aan ’n toenemende samestellingsverandering na ’n meer winsgewende begrafnisbesigheid en prysbewegings op onderskrywingsprodukte.

Die Youi Group het indrukwekkende premiegroei en bedryfsdoeltreffendheid vir die jaar onder oorsig gelewer. Youi het ’n 6.1%-verbetering in bedryfswins en 12.1%-groei in wesensverdienste gelewer ondanks hoër natuurrampeise. Youi se rapporteringsegmente word soos volg saamgestel: Youi Personal, wat alle persoonlike versekeringsprodukte verteenwoordig wat deur die Direct- en BZI-kanale verkoop word, Youi Business, wat die sakeprodukte verteenwoordig wat deur die Direct- en BZI-kanale verkoop en geadministreer word en Youi CTP, wat die CTP-markte in Nieu-Suid-Wallis en Suid-Australië verteenwoordig. In randen Australiese dollarterme het die Youi Group onderskeidelik 28.0%- en 25.3%-groei in bruto geskrewe premies behaal. Die sterk groei is die gevolg van ’n hoër inflasie-omgewing en verbeterde bedryfsuitvoering. Die eiseverhouding het van 55.9% tot 61.6% toegeneem vanweë meer natuurrampe vergeleke met die vorige jaar. Die beweging in die eisverhouding was negatief beïnvloed deur ongunstige reserwe-ontwikkeling, in die besonder op huiseise wat in die vorige finansiële jaar aangegaan is. Hierdie ongunstige ontwikkeling is gekoppel aan die versterking van reserwes vanweë die skerp toename in inflasie oor die afgelope 12 maande en verwante onsekerheid in die daarstelling van eisberamings. Die verhouding van koste-totinkomste het van 31.7% tot 29.6% afgeneem. Hierdie verbetering hou verband met kostedoeltreffendheid wat ondersteuning betref en die voordeel van omsetgroei.

OUTsurance Ireland het in April 2024 met verhandeling begin nadat magtiging met ingang van 1 Januarie 2024 ontvang is. Die loodsproses is inkrementeel en sal uitkring namate vertroue in prysbepaling en bedryfskapasiteit toeneem. Die besigheid het ’n aanvangsverlies van R180 miljoen vir die jaar bedra vergeleke met R56 miljoen in die vorige jaar.