VIR DIE JAAR GEËINDIG 31 MAART 2003

206.00  

–

100.00  

R&R besit 604.3 miljoen gewone aandele en 120.9 miljoen omskepbare aflosbare deelnemende voorkeuraandele in British American Tobacco Plc (BAT). Die voorkeuraandele sal op 7 Junie 2004 teen 'n vaste prys van 675 pennies per aandeel vir kontant afgelos word, tensy dit voor dié datum verkoop word, in welke geval die voorkeuraandele outomaties in BAT-gewone aandele sal omskep.

Gedurende die jaar onder oorsig het Remgro se volfiliaalmaatskappy, Remgro Investments (Eiendoms) Beperk, 11 616 128 gewone aandele teen 'n totale koste van R704.4 miljoen, of R60.64 per aandeel, aangekoop. Dit verteenwoordig 2.4% van die uitgereikte gewone aandele en word as tesourie-aandele gehou.

Die 3.1 miljoen Stanbic-aandele wat in April 2000 by wyse van 'n dividend in spesie uit Gencor Beperk se ontbondeling ontvang is, is gedurende Mei 2002 vir R110.6 miljoen verkoop. 'n Kapitaalsurplus van R77.1 miljoen, na belasting, is met dié transaksie gerealiseer, en is as 'n uitsonderlike item verantwoord.

'n Verdere belegging van R111 miljoen is gedurende Mei 2002 in FirstRand gemaak. Sedertdien is Remgro se direkte belang in FirstRand 9.6%.

Op 20 Augustus 2002 het die Mynwerknemers Pensioenfonds en Sentinel Mynindustrie-aftreefonds (gesamentlik die MPFe), Sage Groep Beperk (Sage) en Financial Securities Beperk (FSL), 'n volfiliaal van Remgro, (gesamentlik die Universa-aandeelhouers) en Sanlam Beperk (Sanlam) bekend gemaak dat hulle die ooreenkomste tussen hulle ten opsigte van hulle belange in Absa Groep Beperk (Absa) herstruktureer het. Hierbenewens het FSL, die MPFe en Sanlam 'n nuwe Absa-aandeelhouersooreenkoms aangegaan. Sage het verkies om hom aan die bestaande Absa-aandeelhouersooreenkoms te onttrek en neem nie deel aan die nuwe Absa-aandeelhouerspoel nie.

Die reëlingskemas waarvolgens Industrial Partnership Investments Beperk (IPI), 'n volfiliaal van Remgro, al die gewone en voorkeuraandele wat hy nie in HL&H besit het nie, verkry het, is op 22 Oktober 2002 deur die Hooggeregshof van Suid-Afrika bekragtig.

Daar is gedurende September 2001 aangekondig dat Robertsons en Unilever Plc (Unilever) 'n beginselooreenkoms gesluit het ingevolge waarvan beide beoog het om hul belange in die gesamentlike onderneming tussen Robertsons en Bestfoods Europa te herstruktureer. Dit was 'n regstreekse gevolg van Unilever se verkryging van Bestfoods se wêreldwye belange.

Die belang in Medi-Clinic het op 31 Maart 2003 52.4% beloop. Voorheen is die belang bo 50% tydelik geag weens personeelopsies wat nog nie uitgeoefen is nie en wat die belang tot 50% of minder sou verwater. Weens die terugkoop van aandele deur Medi-Clinic, sal dié verwagte verwatering tot minder as 50% waarskynlik nie plaasvind nie en gevolglik is Medi-Clinic vanaf 1 April 2002 as 'n filiaalmaatskappy gekonsolideer.

'n Bemagtigingstransaksie is onlangs aangekondig. Die aandeelhouers van Total South Africa, naamlik Total Frankryk, Remgro en Old Mutual, het op 30 April 2003 hul aandeelhouding herskik en Total South Africa het 25% van sy stemdraende kapitaal aan Tosaco (Eiendoms) Beperk (Tosaco) vir kontant uitgereik. Total Frankryk hou nou 50.1% van Total South Africa, Remgro 24.9% en Tosaco 25.0%.

Die ontbondeling van Gencor se belang in Impala Platinum Holdings Beperk (Impala) by wyse van 'n dividend in spesie is op 25 April 2003 deur Gencor se aandeelhouers goedgekeur.

Gencor-aandeelhouers het hul Impala-aandele op 18 Junie 2003 ontvang. Ingevolge die JSE se noteringsvereistes sal Gencor se notering ses maande ná die voorgestelde ontbondeling opgeskort word. Remgro se belang in Impala sal ongeveer 5.0% wees en sal nie volgens die ekwiteitsmetode verantwoord word nie.

Op 9 April 2003 het Sage aangekondig dat dié maatskappy beoog om addisionele kapitaal ten bedrae van R350 miljoen te bekom.

Die rekeningkundige beleid ten opsigte van die maatskappy se langtermyn aandele-aansporingskema (die "skema") is verander.

In die verlede is die verwaterde wesens- en basiese verdienste per aandeel gebaseer op die geweegde aantal uitgereikte aandele na aanpassing vir die verwateringseffek van aandele wat aan deelnemers van die skema uitgereik sou word. Die trustees van die aandeletrust het intussen besluit om aandele vir hierdie doel eerder in die ope mark aan te koop en 3 950 000 aandele ten bedrae van R277 miljoen is in Junie 2002 aangekoop.

Gedurende die jaar onder oorsig het die maatskappy RE 433: Konsolidasie en ekwiteitsverantwoording – Potensiële stemregte en allokasie van eienaarsbelang, geïmplementeer. Die uitwerking op verdienste vir die jaar geëindig 31 Maart 2002 was nie wesentlik nie, derhalwe is die vergelykende inkomstestaat nie hersaamgestel nie.

Die ontleding van "Ekwiteit" en "Bron van wesensverdienste" hieronder dui die afdelings aan waarin die belange ingedeel is. Elke afdeling verteenwoordig die hoofbedryfsektor van die beleggings wat daaronder ingedeel is. Geen aansuiwering is gemaak vir gevalle waar 'n maatskappy hoofsaaklik in een sektor bedrywig is maar ook belange in 'n ander sektor het nie.

(381) 

Gedurende die jaar het die trustees van die Remgro Aandeleskema (die "skema") van die gewone aandele aan deelnemers aangebied soos volg: (Verwys ook aantekening 27)

Die aanbiedinge is geldig vir een jaar vanaf die datum van aanbod. Die skema is 'n uitgestelde aankoopskema en betaling geskied in drie gelyke jaarlikse paaiemente waarvan die eerste paaiement eers na drie jaar betaalbaar word. Deelnemers het geen regte tot lewering, stemming of dividende op aandele voordat betaling geskied nie. Deelnemers kan kies om op 'n later datum te betaal met die gevolglike uitstel van regte. Betaling moet egter voor die verstryking van tien jaar geskied.

'n Ooreenkoms is in 2000 met 'n diensmaatskappy, M&I Bestuursdienste (Eiendoms) Beperk (M&I), aangegaan om bestuurs- en ondersteunende dienste aan Remgro te verskaf. Die aandeelhouers van M&I is werknemers van M&I, wat al die uitgereikte gewone aandele besit. Rembrandt Trust (Eiendoms) Beperk (Rembrandt Trust) besit al die A-gewone aandele van M&I. Die A-gewone aandele het slegs stemreg, maar het geen regte tot die inkomste of bates van M&I nie.

Rembrandt Trust hou al die uitgereikte ongenoteerde B-gewone aandele van die maatskappy en is geregtig op 42.2% van die totale stemreg.

Besonderhede van filiaalmaatskappye, geassosieerde maatskappye en ander beleggings word in Bylae A en B uiteengesit.

Mnr P J Erasmus het op 28 Augustus 2002 as 'n nie-uitvoerende direkteur afgetree.

Die name van die direkteure verskyn op bladsye 6 en 7.

Die raad beveel aan dat die totale direkteursvergoeding betaalbaar vir dienste as direkteure die afgelope finansiële jaar gelewer, op R900 420 (2002: R499 000) vasgestel word.

Daar word aanbeveel dat 'n algemene magtiging aan die raad toegestaan word om, indien omstandighede dit regverdig, die maatskappy se eie aandele te verkry en om goedkeuring aan enige filiaalmaatskappye van die maatskappy te gee om aandele in die maatskappy te verkry, onderhewig aan die bepalings van die Maatskappywet 61 van 1973, soos gewysig en die noteringsvereistes van die JSE.

'n Finale dividend van 160 sent (2002: 133 sent) per aandeel is verklaar ten opsigte van beide die gewone aandele van een sent elk en die ongenoteerde B-gewone aandele van tien sent elk, vir die finansiële jaar wat op 31 Maart 2003 geëindig het.

Die finale dividend is betaalbaar aan aandeelhouers van die maatskappy wat op Vrydag, 15 Augustus 2003, geregistreer is.

Die naam en adres van die maatskappysekretaris verskyn op bladsy 74.

Die finansiële jaarstate op bladsye 34 tot 73 uiteengesit, is deur die raad goedgekeur.