Gesondheidsorg

Mediclinic se bydrae tot Remgro se wesensverdienste, wat Manta Bidco Beperk (Manta Bidco) se bydrae insluit, het R1 515 miljoen (2023: R1 691 miljoen) bedra, wat ’n afname van 10.4% verteenwoordig. As gevolg van die Mediclinic-verkryging het Remgro se indirekte belang in Mediclinic van 44.6% tot 50.0% (of met 5.4%) gedurende Junie 2023 toegeneem. Aangesien Mediclinic egter ’n Maart-jaareinde het, het Remgro Mediclinic se resultate vir die twee maande geëindig 31 Mei 2023 teen 44.6% en vir die 10 maande geëindig 31 Maart 2024 teen 50.0% verantwoord. Mediclinic se bydrae sluit transaksiekoste in van R165 miljoen (2023: R612 miljoen) wat met die Mediclinic-verkryging verband hou. Met hierdie transaksiekoste uitgesluit, het Mediclinic se bydrae tot wesensverdienste van R2 303 miljoen tot R1 678 miljoen (of met 27.1%) afgeneem.

Mediclinic (Manta Bidco uitgesluit) rapporteer aangepaste verdienste, wat onbestendigheid ten opsigte van sekere buitengewone inkomste en koste verwyder, om finansiële en bedryfsprestasie te beoordeel, en as ’n manier om aan beleggers en ontleders aanvullende inligting te verskaf om die finansiële vertoning beter te verstaan. Hierdie aanpassings het die gedeelte van die bogenoemde transaksiekoste wat deur Mediclinic aangegaan is, ingesluit. Die jaar onder oorsig het ook beduidende bedrae ingesluit wat met ’n toename in die aflossingsverpligting (Hirslanden La Colline Grangettes) en ’n versnelde waardeverminderingskoste (Klinik Aarau) verband hou. Die vergelykende jaar het bedrae ingesluit wat met ’n afname van aflossingsverpligting, ’n versnelde waardeverminderingskoste (Klinik St. Anna) en ’n positiewe Switserse kanton-belastingkoersverandering verband hou.

In VSA-dollar terme, het Mediclinic (Manta Bidco uitgesluit) se gerapporteerde aangepaste verdienste teen $230 miljoen (31 Maart 2023: $229 miljoen) byna onveranderd gebly. Remgro se gedeelte van Mediclinic se aangepaste verdienste het met 22.3% tot R2 137 miljoen (2023: R1 748 miljoen) toegeneem, wat ’n verswakte gemiddelde SA-rand wisselkoers teen die VSAdollar en Remgro se verhoogde belang in Mediclinic weerspieël.

Mediclinic se resultate vir die jaar geëindig 31 Maart 2024 is beïnvloed deur ’n swak prestasie in Switserland wat deels teengewerk is deur ’n sterk vertoning in die Midde-Ooste. Mediclinic se omset was 5% hoër teen $4 592 miljoen (2023: $4 356 miljoen) en was 5% hoër in konstante wisselkoersterme. Hierdie resultaat is hoofsaaklik vanweë ’n 0.9%-groei in binnepasiënt- en ’n 1.6%-groei in dagtoelatings wat deels teengewerk is deur ’n laer gemiddelde omset per geval weens veranderinge in die samestelling van gevalle en voortdurende druk op tariewe.

Die aangepaste EBITDA was 2% laer teen $673 miljoen (2023: $685 miljoen) en was 2% laer in konstante wisselkoersterme. Mediclinic se aangepaste EBITDA-marge het afgeneem tot 14.7% (2023: 15.8%) wat verhogings bo die inflasiekoers in die kostebasis weerspieël – in die besonder koste vir werknemers, kontrakteurs, verbruiksgoedere en voorraad.

Mediclinic het kontantomskakeling van 92% (2023: 102%) gelewer wat binne die omskakeling-teikenkoers van 90-100% val.

Gedurende 2018 het Mediclinic 60% van Clinique des Grangettes verkry. As deel van die verkryging is Clinique des Grangettes en Clinique La Colline saamgevoeg. Mediclinic het ’n geskrewe ooreenkoms met ’n koop-en-verkoopopsie aangegaan vir die oorblywende 40%-belang in die entiteit. Die minderheidsaandeelhouer het gedurende die jaar onder oorsig sy verkoop-opsie uitgeoefen, en gevolglik het Mediclinic 30% van die saamgevoegde maatskappy teen ’n bedrag van $131 miljoen verkry. Op 31 Maart 2024 is daar ’n koop-en-verkoop-opsie vir die oorblywende 10% wat nie voor 31 Maart 2026 uitgeoefen kan word nie.

Switserland se omset het met 0.3% tot CHF1 905 miljoen (2023: CHF1 900 miljoen) toegeneem met binnepasiënt-toelatings wat 0.8% hoër was vergeleke met die vorige jaar. Die algemene versekeringsamestelling het tot 52.1% (2023: 51.7%) toegeneem. Die gemiddelde duur van verblyf het met 4.7% afgeneem wat ’n besettingskoers van 58.1% (2023: 61.1%) tot gevolg gehad het.

Omset vir buitepasiënte en daggevalle het met 2% tot CHF408 miljoen (2023: CHF399 miljoen) toegeneem wat 21% (2023: 21%) tot die totale omset gedurende die jaar bygedra het. Werknemervoordele en kontrakteurkoste is deur inflasieverwante salarisverhogings en voortgesette besteding op kontraktering en oortydkoste beïnvloed. Dit, tesame met ’n toename in verbruiksgoedere en voorraad vanweë insetkoste, het gelei tot ’n 9%-afname in die aangepaste EBITDA tot CHF255 miljoen (2023: CHF280 miljoen). Die aangepaste EBITDA-marge was 13.4% (2023: 14.7%). Kontantomskakeling van 82% (2023: 105%) weerspieël laer invorderings gedurende die jaar.

Suider-Afrika se omset het met 7% tot R20 786 miljoen (2023: R19 506 miljoen) toegeneem. Met daggevalle wat binnepasiënttoelatings oorskry het, het betaalde pasiëntdae met 0.5% toegeneem. Besetting het in ’n geringe mate afgeneem tot ’n gemiddelde van 67.4% (2023: 67.7%) danksy uitgebreide kapasiteit wat vir toekomstige groei ontwikkel is. Die gemiddelde omset per bed was 5.7% hoër vergeleke met die vorige jaar, wat onder die gemiddelde jaarlikse tariefverhoging was hoofsaaklik weens die invloed van netwerksamestellings. Die gemiddelde duur van verblyf het met 0.3% toegeneem. Die aangepaste EBITDA het teen R3 784 miljoen (2023: R3 775 miljoen) byna onveranderd gebly wat tot ’n aangepaste EBITDA-marge van 18.2% (2023: 19.4%) gelei het aangesien omsetgroei deur hoër werknemervoordeleen kontrakteurkoste en groter besteding aan IKT (inligtings- en kommunikasietegnologie) teengewerk is. Kontantomskakeling van 93% (2023: 103%) weerspieël stadiger invorderings van handelsdebiteure.

In die Midde-Ooste het omset vir die jaar met 10% tot AED4 892 miljoen (2023: AED4 459 miljoen) toegeneem danksy sterk groei in kliëntbedrywighede. Binnepasiënttoelatings en daggevalle was onderskeidelik 9% en 15% hoër. Buitepasiëntgevalle was 4% hoër. Die toename in volume is deels teengewerk deur ’n afname in die gemiddelde omset per geval weens veranderinge in die samestelling van gevalle. Die aangepaste EBITDA het met 11% tot AED714 miljoen (2023: AED641 miljoen) toegeneem hoofsaaklik vanweë sterk omsetprestasie wat deels teengewerk is deur ’n toename in verbruiksgoedere en voorraad weens die spesialiteitsamestelling. Die aangepaste EBITDA-marge het toegeneem tot 14.6% (2023: 14.4%). Die afdeling se kontantomskakeling was 107% (2023: 99%).